Elsa B. Friðfinnsdóttir, formaður Félags íslenskra hjúkrunarfræðinga, vill óbreytt fyrirkomulag við yfirstjórn Landspítalans, en fram kom á fundi læknaráðs spítalans um helgina að best væri að læknir gegndi forstjórastarfi þar.
Elsa hefur efasemdir um að það standist lög að breyta stjórnkerfi spítalans á þennan hátt. Núverandi fyrirkomulag, þar sem starfa framkvæmdastjóri lækninga og framkvæmdastjóri hjúkrunar, sé gott og óþarfi að breyta því.
Á opnum fundi læknaráðs Landspítalans á laugardag kom meðal annars fram sú skoðun að læknir ætti að stjórna spítalanum í framtíðinni. Undir þetta tók Björn Zoëga, settur forstjóri spítalans. Elsa B. Friðfinnsdóttir formaður Félags íslenskra hjúkrunarfræðinga segir það hins vegar skipta mestu máli að sá hæfasti sé valinn í starfið. Núverandi fyrirkomulag, þar sem starfa framkvæmdastjóri lækninga og framkvæmdastjóri hjúkrunar, sé gott og óþarfi að breyta því.
,,Ég sé reyndar ekki að það myndi samrýmast lögum því að í lögum er skýrt kveðið á um að faglega ábyrgð hvorrar stéttar fyrir sig. Hjúkrunarfræðingar ættu ekki að vera yfir læknum og læknar ekki yfir hjúkrunarfræðingur. Ég sé ekki að það væri valkostur,” segir Elsa.
Björn Zoëga viðraði einnig þá hugmynd í útvarpsfréttum um helgina að Landspítalinn verði gerður að opinberu hlutafélagi. Elsa segist tilbúin til að skoða það. Gæta þurfi þess hins vegar að þjónustan skerðist ekki og að réttindi starfsmanna haldist. Hún telur þó að ekki hafi verið rætt til hlítar hvernig þetta yrði gert. Hún hræðist það að breytingin myndi leiða til ákveðinnar misskiptingar í þjónustunni. Þar kæmi til efnahagur einstaklinga auk þess sem reyndara og hæfara starfsfólk myndi safnast á þá staði þar sem meiri fjármunir eru, hugsanlega í einkarekstri. Almennari þjónustan yrði þá kannski ekki eins góð. ,,Þannig að það yrði stéttaskipting í þjónustunni. Það er náttúrulega eitthvað sem við ættum ekki að líða,” segir Elsa.
www.ruv.is 21.04.2008
