Indverskum rannsóknum á svokallaðri „fjölpillu“ miðar vel. Pillan, sem yrði ódýr í framleiðslu, myndi varna m.a. gegn hjartaáföllum og heilablóðfalli.
Ætlunin er að geta dregið úr líkum á hjartasjúkdómum um allt að 80% hjá fólki yfir 55 ára aldri. Pillan komst fyrst í umræðuna fyrir rúmum fimm árum en litlar framfarir hafa orðið á þróun hennar. Nú segjast indverskir vísindamenn hinsvegar hafa náð að framleiða slíka pillu sem er örugg fyrir þá sem gleypa hana.
Margir sérfræðingar eru þó mótfallnir slíkri pillu, sem ætlað er að virka sem lyfi við lífstílstengdum sjúkdómum. Takast eigi á við vandamál tengd of háum blóðþrýstingi og kólesteróli með breyttu og bættu mataræði og líkamsrækt, í stað þess að innbyrða pillur.
Fjölpillan sem skoðuð var í síðustu rannsókn samanstendur af fimm lyfjum sem víða er hægt að fá hvert í sínu lagi. Aspiríni, lyfi til að lækka kólesteról og þremur lyfjum til að lækka blóðþrýsting. Þar að auki var fólínsýra í pillunni.
Rúmlega 2.000 heilbrigðir einstaklingar tóku þátt í rannsókninni. Þeir voru lausir við hjartasjúkdóma en bjuggu yfir áhættuþáttum, þ.e. annað hvort voru með of háan blóðþrýsting eða höfðu reykt í lengri tíma. Í ljós kom að fjölpillan gagnaðist jafnvel og ef lyfjanna, sem pillan samastendur af, væri neytt hvert í sínu lagi. Blóðþrýstingur lækkaði sem og kólesterólið og varð engra meiriháttar aukaverkana vart.
Vísindamennirnir telja að samanlögð áhrif lyfjanna gæti fækkað hjartaáföllum og heilablóðfalli um helming í miðaldra fólki. Það þýðir að pillan gæti bjargað tugi milljónum manna árlega á heimsvísu.
www.mbl.is 31.03.2009
