Guðlaugur Þór Þórðarson, heilbrigðisráðherra, segist treysta faglegum forsvarsmönnum til að stýra Landspítalanum og gerir enga athugasemd við þá ákvörðun að hætta að láta lækna starfa í neyðarbílnum á höfuðborgarsvæðinu. Guðlaugur vísar því á bug að með breytingunni sé öryggi sjúklinga teflt á tæpasta vað og nefnir í því sambandi að landlæknir hafi tjáð sig um málið og telji að hún dragi ekki úr öryggi, heldur þvert á móti.
Kolbrún Halldórsdóttir, þingmaður VG, spurði ráðherrann um afstöðu til málsins en breytingin tók gildi í dag og eru sjúkrabílar nú einungis mannaðir bráðatæknum en læknar verða sendir á staðinn í sérstökum bílum sé þess þörf. Kolbrún vitnaði til orða Bjarna Þórs Eyvindarsonar, sem var einn læknanna á sjúkrabílum, um að bráðatæknar gætu hvorki gefið lyf, svæft sjúklinga né barkaþrætt þá og því ykjust líkur á alvarlegum heilaskaða. Kolbrún spurði hvort ráðherrann teldi 30 milljóna króna sparnað í bókhaldi Landspítalans þess virði að auka þessa áhættu og spurði hvort ráðherrann sæi fyrir sér möguleika á breytingin leiddi til aukinna útgjalda á auknum póstum, t.d. í meðferð heilaskaðaðra.
Guðlaugur sagði það ábyrgðarhluta hjá Kolbrúnu að halda því fram að teflt væri á tæpasta vað með breytingunum, stjórnendur færu ekki út í slíkar aðgerðir enda sinni þeir starfi sínu vel. Þá minnti hann á að landlæknir hefði lýst því yfir í fjölmiðlum að breytingin drægi ekki út öryggi. Kolbrún sagði svör ráðherrans loðin og sagði að gagnrýnin á breytinguna væri faglegs eðlis og kæmi frá læknum sem gjörþekktu málið. Eðlilegt sé að heilbrigðisráðherra svari því hvernig það geti verið forsvaranlegt að fara í sparnaðaraðgerðir sem mögulega geti teflt öryggi sjúklinga í tvísýnu.
www.eyjan.is 17.01.2008
