Ný úttekt landlæknisembættisins á stöðu öryggismála vegna mönnunar á Landspítalanum, sem unnin var að beiðni heilbrigðisráðherra, var að stórum hluta byggð á upplýsingum úr sjúklingaflokkunarkerfi sem hefur ekki verið uppfært í langan tíma og var aflagt í nóvember. Félag íslenskra hjúkrunarfræðinga (FÍH) gagnrýnir úttektina harðlega.
„Við greiningu embættisins er notað tæki sem hefur ekki verið uppfært síðan 2004 og innleiða á nýtt matskerfi sem mælir raunverulega hvað er gert,” segir Elsa B. Friðfinnsdóttir, formaður FÍH. „Þetta er því mjög ófullkomið mælitæki sem þarna er byggt á. Á sama tíma hvetur heilbrigðisráðherra landlæknisembættið til að auka eftirlit vegna niðurskurðar, þegar í raun eru engin áreiðanleg mælitæki til svo að embættið geti sinnt lögbundnu eftirlitshlutverki sínu.”
Vegna niðurskurðar á Landspítala var upptöku nýs sjúklingaflokkunarkerfis frestað. Eins og staðan er í dag fer því engin skráning fram á Landspítala til þess að meta hjúkrunarþyngd eða þá hjúkrun sem veitt er.
Sjúklingaflokkunarkerfið sem liggur til grundvallar niðurstöðu landlæknisembættisins er frá árinu 1994. Samningi á milli Landspítala og fyrirtækisins sem sá um uppfærslu kerfisins var sagt upp árið 2004 og hefur það ekki verið uppfært síðan. Vegna fyrirhugaðs flutnings á sjúklingabókhaldi á Landspítala í nýtt kerfi var sjúklingaflokkun og þar með mælingu á hjúkrunarþyngd hætt í nóvember 2009.
Elsa segir að fleira veiki niðurstöðu landlæknisembættisins. „Það vita það allir að atvikaskráningin sem embættið vitnar til í úttektinni er mjög ófullkomin, en hún hefur reyndar verið það lengi. Það er því verið að bera ófullkomna mælingu við aðra ófullkomna.” Atvikaskráning LSH tekur til frávika sem hjúkrunarstarfsfólk telur að geti ógnað öryggi sjúklinganna, segir Elsa. Laura Sch. Thorsteinsson, verkefnisstjóri gæða- og lýðheilsusviðs landlæknisembættisins, vildi ekki tjá sig um gagnrýni FÍH þegar eftir því var leitað. Ástæðan er að embættið vinnur nú að frekari skoðun á öryggi á LSH. – shá
www.visir.is 28.01.2009
