Leiddar eru líkur að því að viðvera læknis hefði skipt sköpum fyrir sjúkling sem nýverið lést á Landspítalanum eftir að hafa verið fluttur með læknislausum neyðarbíl. Hann lést úr hjartaáfalli skömmu eftir komuna á spítalann. Tilfellið var rannsakað ofan í kjölinn en almennt er erfitt að fullyrða að læknir hefði breytt gangi mála.
Sjúklingur lést nýverið strax við komuna á Landspítalann við Hringbraut eftir að hafa verið fluttur í neyðarbíl án læknis. Þetta er fyrsta tilvikið sem upp kemur síðan læknar hættu að ganga vaktir á neyðarbílnum þar sem leiddar eru líkur að því að viðvera læknis hefði skipt sköpum fyrir sjúklinginn sem lést.
Sú breyting gekk í gegn 17. janúar síðastliðinn að læknar hættu að ganga vaktir á neyðarbíl eftir að yfirstjórn Landspítalans tók þá ákvörðun í sparnaðarskyni. Áfram þjónusta læknar bílinn hins vegar en með þeim hætti að þeir eru kallaðir út í sérvöldum tilvikum. Þeir læknar sem starfað hafa á bílnum mótmæltu harðlega og viðruðu þær áhyggjur sínar að breytingin gæti kostað mannslíf.
Tveimur mánuðum eftir breytinguna er komið upp tilvik þar sem sumir viðmælendur DV spyrja sig hvort læknir í neyðarbíl hefði getað bjargað mannslífi. Viðkomandi sjúklingur lést úr hjartaáfalli tæpum 20 mínútum eftir komuna á spítalann og leiddar eru líkur að því að viðvera læknis hefði getað skipt sköpum.
DV fjallar ítarlega um málið í dag.
www.dv.is 13.03.2008
