„ÞETTA er langtímaverkefni og menn hafa ákveðinn sveigjanleika í því,“ segir Guðlaugur Þór Þórðarson, heilbrigðisráðherra, þegar hann er spurður hvernig staðan sé í undirbúningi byggingar nýs háskólasjúkrahúss við Hringbraut.
„Þetta er stórt verkefni sem tekur langan tíma og búið að vinna mjög lengi að. Það liggur alveg fyrir að, hvað sem öðru líður, þá þarf betra húsnæði en það sem við erum með núna fyrir nútíma sjúkrahúsþjónustu,“ segir Guðlaugur. Tekur hann fram að hönnunarvinnunni sé enn ekki lokið. „Því betur sem hugað er að undirbúningnum, því meiri líkur eru á því að uppbyggingin verði hagstæðari,“ segir Guðlaugur. Bendir hann á að í nýframlögðum fjárlögum fyrir næsta ár sé gert ráð fyrir 800 milljónum króna til þess að halda hönnunarvinnunni áfram.
Morgunblaðið 16.10.2008
