-Auglýsing-

Gagnagrunni breytt á röngum forsendum

Persónuvernd segir rangar upplýsingar frá landlækni hafa verið notaðar þegar lögum um lyfjagagnagrunn var breytt. Upplýsingar um lyfjakaup eru geymdar í 30 ár. Persónuverndarsjónarmið voru virt segir formaður heilbrigðisnefndar Alþingis.
 
Breytingar á lögum um miðlægan lyfjagagnagrunn voru byggðar á röngum upplýsingum frá Landlæknisembættinu. Persónuvernd gerir athugasemdir við breytingarnar, sem gerðar voru á lyfjalögum í vor og vill breyta lögum á ný.

Persónugreinanlegar upplýsingar um lyfjakaup landsmanna eru nú geymdar í 30 ár, ekki þrjú ár eins og áður var heimilt.

“Við teljum að þetta sé ekki í samræmi við grundvallarreglur um meðalhóf í meðferð svo viðkvæmra upplýsinga,” segir Sigrún Jóhannesdóttir, forstjóri Persónuverndar. Hún segir að samkvæmt þarfagreiningu sem fram fór fyrir nokkrum árum eigi að duga að geyma upplýsingarnar í þrjú ár til að fylgjast með misnotkun á lyfjum. Sé vilji til þess að geyma upplýsingar lengur í vísindaskyni sé hægt að gera gagnagrunninn ópersónugreinanlegan eða finna aðrar leiðir til að tryggja öryggi upplýsinganna.

Í nefndaráliti meirihluta heilbrigðisnefndar um breytingar á lyfjalögum kemur fram að samkvæmt umsögn Landlæknisembættisins séu gögn í sambærilegum gagnagrunnum á hinum Norðurlöndunum varðveitt í 30 ár. Persónuvernd kannaði lagaumhverfi gagnagrunna á Norðurlöndunum, og komst að því að þetta á ekki við rök að styðjast.

Persónuvernd sendi nýverið heilbrigðisráðherra og formanni heilbrigðisnefndar Alþingis bréf þar sem vakin er athygli á þessu. Sigrún segir það skoðun Persónuverndar að breyta verði lögunum á nýjan leik svo persónugreinanlegar upplýsingar séu ekki geymdar lengur en nauðsynlegt sé í miðlægum gagnagrunni.

Ásta Möller, formaður heilbrigðisnefndar Alþingis, segir að í öllum tilvikum séu persónuverndarsjónarmið virt, aðgangur að gagnagrunninum lúti ströngum reglum og sé aðeins heimill með samþykki landlæknis.

- Auglýsing-

“Við hlustuðum á þessi sjónarmið Persónuverndar, en okkar mat var það að þær upplýsingar sem við hefðum í höndunum réttlættu þessar breytingar,” segir Ásta.

Hún segir þau sjónarmið hafa verið mikilvæg að stundum komi aukaverkanir lyfja ekki fram fyrr en mörgum árum eftir að þeim var fyrst ávísað.

- Auglýsing -

Hvorki náðist í landlækni né aðstoðarlandlækni við vinnslu fréttarinnar.

Lyfjagagnagrunnar á Norðurlöndunum.

Ísland Upplýsingar geymdar í 30 ár.

Danmörk Upplýsingar geymdar í tvö ár.

Finnland Upplýsingar geymdar í 30 mánuði, og eftir það í tíu ár í öðrum gagnagrunni með strangari aðgangsheimildum.

Noregur Dulkóðaður gagnagrunnur, upplýsingum er ekki eytt.

Svíþjóð Upplýsingar geymdar í annað hvort þrjá mánuði eða fimmtán mánuði.

brjann@frettabladid.is

Fréttablaðið 08.08.2008 

-Auglýsing-
Björn Ófeigsson
Björn Ófeigsson
Björn er ritstjóri og ábyrgðarmaður hjartalif.is með brennandi áhuga á hjartans málefnum auk þess að vera sjálfur hjartabilaður og með gangráð/bjargráð.

Tengt efni

-Auglýsing-
-Auglýsing-
-Auglýsing-
Auglýsing
-Auglýsing-
-Auglýsing-
-Auglýsing-
-Auglýsing-
-Auglýsing-