ASPERÍN gagnast helst karlpeningnum því nýjar rannsóknaniðurstöður benda til að verkjalyfið verndi karlmannshjartað í mun meira mæli en kvenmannshjartað. Sumar fyrri rannsóknir hafa bent til þess að lyfið geti dregið úr hjartaáfalli um allt að helming, en nú hafa kanadískir sérfræðingar við háskólann í Bresku-Kólumbíu sem sagt sýnt fram á kynjamun í þessu tilliti, að því er vefmiðill BBCgreindi frá fyrir skömmu. Þeir telja að lyfið gagnist konum síður en körlum, en mæla gegn því að konur, sem eru að taka lyfið í kjölfar hjartaáfalls, hætti að taka það.
Blóðkekkir myndast síður
Hjartaáfall á sér stað að tilstuðlan æðaþrengsla eða skemmda í æðaveggjum með þeim afleiðingum að blóðkekkir myndast sem stífla blóðflæði til hjartans. Asperín hefur þau áhrif að erfiðara er fyrir blóðkekkina að myndast sem aftur dregur úr líkum á hjartaáfalli. Þetta hefur leitt til þess að fjöldi fólks um heim allan er að taka lyfið á degi hverjum í forvarnarskyni. Það hefur þó ekki skýrt verið sýnt fram á nákvæma gagnsemi lyfsins í þessu samhengi og sumar rannsóknir hafa gefið þá niðurstöðu að ólíklegt sé að asperínið hafi yfir höfuð nokkur hjartastyrkjandi áhrif.
Morgunblaðið 12.11.2007
Auglýsing
