Gæti hugsanlega verið að omega 3 sé ein af leiðunum til lífsgæða? Lukka Pálsdóttir á Happ setur hlutina oft í skemmtilegt samhengi auk þess sem hún gerir það sem okkur mörgum hverjum þykir flókið, einfalt. Gefum Lukku orðið.
Þú finnur muninn þegar þú ferð úr gömlu DSL tengingunni yfir í ljósleiðara tengingu. Allt verður hraðvirkara og skýrara. Við viljum hafa samskipti skýr og öflug. Þegar við sendum skýr skilaboð eru meiri líkur á að ná þeim árangri sem við viljum. Óskýr skilaboð skila stundum allt annarri niðurstöðu en við ætluðum.
En vissirðu að þú getur uppfært samskipti taugafrumanna í háhraða ljósleiðara tengingu með því að passa að gefa þeim nægjanlegt magn af omega 3 fitusýrum? Omega 3 fitusýrur eru mikilvægar í frumuhimnum líkamans og stuðla að skýrari og betri samskiptum á milli þeirra. Nægjanlegt magn omega 3 og bazinga.
Skilaboðin skjótast á milli með leifturhraða frá frumu til frumu á skýran og skilvirkan hátt. Ef þú borðar reglulega fisk eða grænmeti úr hafinu s.s. þörunga og þang, færðu ríkulegan skammt af omega 3.
Er dýrið alið á grasi eða ekki?
Þú getur líka fengið omega 3 úr kjöti en þá þarftu að spyrja steikina hvort hún hafi ekki örugglega borðað grænt gras. Ef dýrið sem þú leggur þér til munns er alið á korni í stað grass þá raskast hlutföllin mikið og það gefur þér omega 6 í miklu stærri skammti en omega 3. Því inniheldur kjöt og aðrar dýraafurðir svo sem egg og beikon ekki nálægt því sömu næringarefni og þessar afurðir gerðu áður.
Hjálpa til við að þynna blóð
Omega 3 fitusýrur gera líkama og sál margvíslegt gagn því þær hjálpa til við að þynna blóð, stjórna eða hamla frumuvexti og vinna gegn einkennum þunglyndis.
Eitt af mikilvægum hlutverkum þeirra er að draga úr bólgum með því að keppa um sæti á frumuhimnunni við hina bólgumyndandi omega 6 fitusýru.
Stuðla að bættum samskiptum
Þannig geta omega 3 fitusýrur stuðlað að bættum samskiptum um leið og þær stuðla að betri heilsu og veita vörn gegn hjarta- og æðasjúkdómum og fjölmörgum öðrum langvinnum sjúkdómum. Omega 3 færir þér líka fallegri húð og meiri æskuljóma og líklega er það sú staðreynd sem fær þig til að passa betur upp á að fá nóg af henni.
Fæðutegundir sem eru ríkar af omega 3 eru til dæmis:
– Fræ s.s. hörfræ og chia fræ
– Fiskur s.s. lax, silungur, sardínur og túnfiskur
– Valhnetur
– Spírur
– Dökkgrænt grænmeti
– Olíur s.s. lýsi og hörfræolía
Áfram omega 3.
