Heilbrigðisráðherra hefur veitt Huldu Gunnlaugsdóttur, forstjóra Landspítalans, ársleyfi frá störfum. Eins og Pressan skýrði frá í gær hefur mikil óvissa ríkt um framtíð Huldu á sjúkrahúsinu.
Pressan skýrði í gær frá því að Hulda hefði farið fyrr í sumarfrí en áætlað hafði verið vegna persónulegra ástæðna en vaxandi áhyggjur væru meðal starfsfólks sjúkrahússins um að breyttar ytri aðstæður gerðu það jafnframt að verkum að Hulda myndi jafnvel ekki snúa aftur til starfans.
Áætlanir stjórnvalda um launalækkun forstjóra fyrirtækja og stofnana í eigu ríkisins, óvissa um byggingu nýs hátæknisjúkrahús, niðurskurðarhugmyndir í heilbrigðisgeiranum eru væntanlegar og mögulegur atgervisflótti sem óttast er að verði í lækna- og hjúkrunarfræðistéttum vegna efnahagsástandsins eru meðal þátta sem Hulda hefur horft til, en ekki síður ráða persónulegar ástæður ákvörðun Huldu.
Í kjölfar fréttar Pressunnar óskaði Hulda eftir því við heilbrigðisráðherra að fá ársleyfi frá störfum. Það hefur ráðherra gert frá og með 1. október næst komandi. Björn Zoëga mun sinna starfi forstjóra meðan á ársleyfi Huldu stendur.
www.pressan.is 28.07.2009
