Það er eitthvað sérstakt við að hjóla – frelsistilfinningin, ferska loftið og hreyfingin sem fær hjartað hreinlega til að slá af gleði.
Fyrir okkur sem höfum þurft að glíma við hjartasjúkdóma eða höfum takmarkaða getu af einhverjum orsökum, þá eru hjólreiðar meira en bara skemmtun þær geta verið lífsnauðsynlegar. Í dag vitum við að reglulegar hjólreiðar eru ein besta hreyfingin sem til er fyrir hjartað og rannsóknir styðja það.
Ég ætla að deila því sem rannsóknir sýna og flétta inn minni eigin reynslu af því að hjóla á rafmagnshjóli. Vonandi næ ég að hvetja þig til að hjóla oftar – hvort sem það er á rafmagns eða venjulegu hjóli og njóta útiveru og náttúrunnar í leiðinni.
Hjartað styrkist með hverjum snúningi
Þegar þú hjólar fer hjartað að vinna – og það líkar því vel. Hjólreiðar eru loftháð hreyfing sem styrkir hjartavöðvann, eykur blóðflæði og bætir súrefnisupptöku. Þetta hefur bein áhrif á hvíldarpúls, blóðflæði til vöðva og getu hjartans til að takast á við álag.
Þeir sem hjóla reglulega eru í minni hættu á að fá hjartaáfall og ef hjartað hefur þegar sýnt veikleikamerki getur hjólreiðaþjálfun bætt líðan, dregið úr einkennum og jafnvel lengt líf.
Blóðþrýstingur og kólesteról í betra jafnvægi
Blóðþrýstingur hefur mikil áhrif á hjartaheilsu, og hjólreiðar geta hjálpað til við að halda honum í skefjum. Þegar þú hjólar reglulega, helst 3–5 sinnum í viku, þá lækkar hvíldarblóðþrýstingurinn smám saman.
Sama gildir um kólesteról – hjólreiðar auka HDL (góða kólesterólið) og draga úr LDL (slæma kólesterólinu). Þetta minnkar hættuna á æðakölkun og öðrum hjartatengdum vandamálum.
Hjólið hjálpar til við þyngdarstjórnun og blóðsykur
Ef þú ert í baráttu við þyngdina þá eru hjólreiðar þægileg og áhrifarík leið til að brenna orku án þess að setja of mikið álag á liði og stoðkerfi.
Fyrir fólk með forstig sykursýki eða sykursýki 2 getur regluleg hreyfing eins og hjólreiðar bætt blóðsykursstjórnun og minnkað insúlínviðnám sem dregur úr hjartaáhættu.
Rafmagnshjól – skref að sjálfstæði og hreyfingu
Fyrir marga með skerta líkamlega getu eða hjartabilun getur verið erfitt að ná upp nægilegu álagi til að fá góð áhrif af hreyfingu – eða þá að viðkomandi þarf að varast að setja of mikið álag á hjartað. Þá koma rafmagnshjól til sögunnar.
Með rafmagnshjóli getur þú stjórnað hversu mikið þú hjólar sjálfur og hversu mikið mótorinn hjálpar til. Þetta gerir fólki kleift að hjóla lengur og öruggar, án þess að ofbjóða hjartanu. Rannsóknir sýna að rafhjól geta bætt súrefnisupptöku, hreyfigetu og andlega líðan – jafnvel hjá fólki með langvinna hjartasjúkdóma.
Það mikilvægasta er að hreyfingin er stöðug án þess að vera of mikil. Þú hjólar í þínum takti og það er nóg.
Andleg líðan – ferskur vindur fyrir hugann
Við tölum oft um líkamlega heilsu en hjólreiðar gera líka gott fyrir andlega heilsu. Þær losa um streitu, bæta skap og hjálpa okkur að slaka á. Það jafnast ekkert á við að hjóla í morgunsólinni eða meðfram sjónum og finna hjartað slá í takt við náttúruna í kringum þig.
Hjólaðu fyrir líkama og sál
Hvort sem þú ert að byrja frá grunni, nota hjólið þitt sem farartæki eða hjóla reglulega – þá er þetta frábær hreyfing fyrir hjartað. Hún er aðgengileg, skemmtileg og áhrifarík.
Hjólaðu fyrir hjartað – og ég get lofað því að það er frábært skref í átt að betri andlegri og líkamlegri heilsu.
Björn Ófeigs.
Heimildir
- British Heart Foundation – Cycling and your heart
https://www.bhf.org.uk/informationsupport/heart-matters-magazine/activity/cycling - Journal of Transport & Health – The health benefits of electrically-assisted cycling
https://www.sciencedirect.com/science/article/abs/pii/S221414051730338X - European Society of Cardiology – E-bike use improves fitness in heart disease patients
https://www.escardio.org/The-ESC/Press-Office/Press-releases/e-bike-use-improves-fitness-in-heart-disease-patients - Mayo Clinic – Atrial fibrillation and exercise: Can it help?
https://www.mayoclinic.org/diseases-conditions/atrial-fibrillation/expert-answers/afib-and-exercise/faq-20058280
