Svefn og svefnvenjur

Svefn og svefnvenjur

HjónarúmSvefn er merkilegt fyrirbæri og kannski eitt af þessum atriðum sem við hugsum kannski ekki nógu meðvitað um dags daglega.

En fyrir sum okkar skiptir miklu máli hvernig við högum lífi okkar til að ná sem bestum svefni, í hvaða stellingu við sofnum helst, opin eða lokaðan glugga, lyf eða ekki lyf, andvökunætur og svo mætti lengi telja.
Hér eru smávægilegar óvísindalegar vangaveltur mínar um svefn og svefnvenjur, aðallega mínar þó.

Svefnstellingar

Eins undarlega eins og það kann að hljóma þá líður mér alltaf best í hjartanu þegar ég sef á vinstri hliðinni og stundum halla mér aðeins yfir á magann. Það er eins og þegar kemur smá þrýstingur á brjóstkassann verði takturinn betri og jafnari og það er góð tilfinning

Mér er aftur á móti nánast lífsins ómögulegt að sofa á hægri hliðinni því þá er eins og hjartað slái út í tómið, eða þannig er tilfinningin í það minnsta.

Ekki nóg með það heldur fæ ég oft á tíðum aukaslög, finn meira fyrir hjartslættinum og fæ almenn hjartsláttarónot.

Ég hef reyndar prófað ýmsar aðferðir eins og að halla mér aðeins meira á magann og sofa með kodda í fanginu til þess að búa til þrýsting og það hjálpar stundum, en ekki alltaf.

Ég get ekki sofið á bakinu því ég hrýt og af tillitsemi við konu mína held ég að mér hafi tekist nokkuð vel að forðast það að sofa á bakinu, alla vega ýtir hún nánast aldrei við mér ( svo ég viti til en því er hún ekki endilega sammála). Auk þess hefur það gerst ef ég sofna á bakinu að ég hrökkvi upp með andfælum, við mínar eigin hrotur.

En það eru fleiri hliðar á svefnvenjum okkar. Svefnstellingarnar fara mismunandi vel með líkama okkar og sumar svefnstellingar eru þannig að meira álag verður á háls og bak sem gerir það að verkum að það kemur fyrir að við vöknum lurkum lamin eða verulega aum í skrokknum.

Mér finnst nauðsynlegt að leggjast á bakið þegar ég vakna og teygja út mér og finna svolítið hvernig ég kem undan nóttinni. Í flestum tilfellum duga þessar teygjur mínar til að ná úr mér næturstirðleikanum og ef ég hef legið eitthvað skakkur þá tekur yfirleitt ekki mjög langan tíma að ná því út líkamanum með teygjunum.

Svefnlyf

Fyrir fjórum mánuðum síðan hætti ég að nota svefnlyf. Þannig var nefnilega mál með vexti að þegar ég veiktist kom í ljós að svefninn minn var ekki í lagi og ég var látinn hafa tvær mismunandi gerðir af lyfjum sem ég notaði á hverri nóttu í 10 ár.

Mér bauðst í vor af fara á svefnnámskeið til að sjá hvort það væri hægt að hjálpa mér eitthvað með svefninn en það var alls ekki yfirlýst markmið að hætta á lyfjunum.

Mér fannst hinsvegar þegar námskeiðið var búið að sú fræðsla sem ég fékk þar gæti hugsanlega nýst mér og ákvað ég að prófa að taka út svefnlyfin.

Það er skemmst frá því að segja að síðan hef ég ekki snert lyfin, svefngæði mín eru allt önnur og betri auk þess sem ég er mikið fljótari að sofna á kvöldin.

Af því að svefninn er betri þá vakna ég fyrr, er frískari á morgnanna og afköstin eru betri og morgundrungi er ekki lengur til staðar.

Það kemur bara nánast ekki fyrir að ég lendi í því að eiga andvökunótt sem kom stundum fyrir þrátt fyrir svefnlyfin þannig að ég er mjög sáttur.

Það kemur þó fyrir endum sinnum að ég vakna fyrir allar aldir en þá reyni ég bara að leggja mig aðeins um hádegisbil.

Það er svolítið merkileg tilfinning að hafa í tíu ár litið á sig sem sjúkling sem átti við alvarleg svefnvandamál að stríða í það að geta lagst til svefns á kvöldi án þess að láta sér til hugar koma að nóttin geti orðið erfið.

Ég er feginn að hafa tekið þessa ákvörðun og að óreyndu hefði ég aldrei trúað hvað þessi einfalda aðgerð hefur haft mikil jákvæð áhrif á líf mitt og í rauninni hvað þetta hefur aukið lífsgæði mín.

Það er mikilvægt fyrir hvern og einn að koma sér upp góðum svefnvenjum til að hámarka svefngæði.

Það er einnig mikilvægt að finna sér þá stellingu sem hentar manni best og manni líður vel í og ég mæli sérstaklega með því að fólk reyni að losa sig við svefnlyf því það hefur ótrúlega mikil áhrif.

Rannsóknir hafa sýnt að svefnlyf gagnast til skamms tíma en langvarandi notkun virðist frekar gera ógagn.

Verulegar líkur eru á því að stór hluti þeirra sem þjáist af svefnleysi eigi við undirliggjandi kvíða að stríða þannig að það væri betri laus til lengri tíma að hafa samband við sérfræðing sem getur greint vandamálið og komið með lausnir sem virka til langframa.

Í rauninni má segja að það sé mikið á sig leggjandi að losna við lyfin og ég hefði aldrei trúað því að óreyndu hvað það er mikill munur.

Björn

Tengt efni:

Laus við svefnlyf

 

Björn er ritstjóri og ábyrgðarmaður hjartalif.is með brennandi áhuga á hjartans málefnum auk þess að vera sjálfur hjartabilaður og með gangráð/bjargráð.

Svipaðar greinar