Einangra hefur þurft nokkrar stofur á barnadeild, öldrunarsviði og hjartadeild Landspítalans vegna veirusýkingar. Á hjartadeild hefur þurft að fækka innköllun í hjartaþræðingar af þessum sökum. Biðlistinn er því lengri en oft áður en nú bíða 240 manns eftir að komast í hjartaþræðingu.
Veikinni veldur svokölluð Nóróveira en hún er bráðsmitandi og berst auðveldlega milli manna. Helstu einkenni hennar eru ógleði, uppköst og niðurgangur.
Nóróveiran er ein algengasta orsök fjöldasýkinga á sjúkrahúsum. Hún hefur borist inn á Landspítalann af og til í vetur en að sögn Ólafs Guðlaugssonar, yfirlæknis á sýkingarvarnardeild Landspítalans, berst hún inn á sjúkrahúsið þegar það er mikið um veikindi úti í samfélaginu. Hann segir að faraldurinn sé óvenjuskæður að þessu sinni og minni um margt á þegar hann var verstur á árunum 2002-2004.
Þetta er alþjóðlegur vandi, segir Ólafur, en síðustu vikur hefur þurft að loka tugum deilda á sjúkrahúsum í Bretlandi. Veiran er hættulaus fullfrísku fólki en getur komið illa við þá sem eru veikir fyrir og þess vegna hefur þurft að einangra um tíu sjúkrastofur á Landspítalanum, m.a. á hjartadeild.
En afleiðingarnar eru víðtækari því ekki hefur verið hægt að sinna hjartaþræðingum sem skyldi og á meðan fjölgar þeim sem bíða. Nú eru 240 manns á biðlistanum sem svo oft hefur verið fjallað um en það er með mesta móti.
Það hlýtur að valda nokkrum áhyggjum því fyrir tæpum fjórum árum sagði Ásgeir Jónsson, sérfræðingur í lyflækningum og hjartasjúkdómum, í grein í Morgunblaðinu að biðlistinn væri orðinn hættulega langur en þá voru 225 manns að bíða en nú eru sem fyrr segir 240 manns á biðlistanum. Meðalbiðtími eftir hjartaþræðingu er 102 dagar. Unnur Sigtryggsdóttir, deildarstjóri hjartadeildar, segir þó að öllum bráðatilfellum sé umsvifalaust sinnt.
Sjá frétt Ríkissjónvarpsins um málið hér
www.ruv.is 31.01.2008
