Söfnuðu 46,6 milljónum

Landsmenn hugsa svo sannarlega um fleira en landsfundi þessa dagana.
Í gærkvöldi söfnuðu Íslendingar 46,6 milljónum króna í landssöfnun Hjartaheilla Öll Þjóðin – eitt hjarta og verður fénu varið til að fjármagna tækjakaup hjartaþræðingadeildar Landspítalans- Háskólasjukrahúss.

Söfnunin sem var á vegum Hjartaheilla, landssamtaka hjartasjúklinga fór fram í skemmtiþætti í opinni dagskrá á Stöð 2 í gærkvöldi, þar sem einstaklingar og fyrirtæki hringdu inn framlög sín.

Fjöldi þekktra listamanna þjóðarinnar, leikarar sem söngvarar, komu þar fram, ljáðu söfnunninni lið og skópu farveg fyrir þennan stórkostlega árangur. Þar má telja Pál Óskar, Egil Ólafsson, Jóhönnu Guðrúnu, Milljónamæringana, Voces Maculorum og fleiri.

Einnig komu fram fyrsti íslenski hjartaþræðingarsjúklingurinn, 84 ára gamall, fyrsti hjartaþeginn, læknar og fjöldi annarra gesta, þar á meðal forseti Íslands, hr. Ólafur Ragnar Grímsson.