„Fyrir fundinn vænti ég þess að stjórnvöld tækju fullt mark á afdráttarlausri yfirlýsingu hjúkrunarfræðinga sem fólst í niðurstöðu atkvæðagreiðslu og stuðningi við boðun yfirvinnubanns. Ég vænti þess einnig að menn gerðu sér grein fyrir því hvað yfirvinna og framlag hjúkrunarfræðinga er nauðsynlegt til þess að halda heilbrigðisþjónustunni gangandi. Ég átti því von á því að stjórnvöld myndu bregðast við á ábyrgan hátt, vegna þess að það er stjórnvalda að sjá til þess að heilbrigðisþjónustan geti gengið fyrir sig eins og ætlast er til. En því miður gekk það ekki eftir,“ segir Elsa B. Friðfinnsdóttir, formaður FÍH. Aðspurð segir hún að engar undanþágur muni gilda í yfirvinnubanni sambærilegar við þær sem gilt hafi í allsherjarverkföllum.
Hjá Guðlaugu Rakel Guðjónsdóttur, starfandi hjúkrunarforstjóra Landspítalans, og Þóru Ákadóttur, starfandi framkvæmdastjóra hjúkrunar á Fjórðungssjúkrahúsinu á Akureyri, fengust þær upplýsingar að stjórnendur þar þyrftu að fá nánari leiðbeiningar frá FÍH um það hvernig bannið verði útfært og hvort einhverjar undanþágur gildi. „Ef um hefðbundið verkfall væri að ræða þá væru ákveðnar undanþágur á ákveðinni starfsemi spítalans til þess að tryggja bráðaþjónustuna. Við þurfum að skoða hvort þau undanþáguákvæði gilda við þessar aðstæður líka,“ sagði Guðlaug Rakel.
Næsti fundur samninganefnda er boðaður nk. mánudag.
Morgunblaðið 26.06.2008
