Sannleikurinn um Viagra

Guðmundur Vikar Einarsson læknir segir alls kyns misskilnings gæta varðandi notkun á Viagra sem vert sé að leiðrétta.

“Þetta er fyrst og fremst lyf sem hjálpar mönnum með stinningarvanda að ná risi, hverjar svo sem orsakir vandans kunna að vera,” heldur hann áfram. “Lyfið eykur blóðflæði til getnaðarlimsins, með því að víkka smáæðarnar um helming. Það getur haft æðavíkkandi áhrif á öðrum stöðum. Þau eru hins vegar lítil og valda ekki óþægindum.”

Guðmundur segir Viagra ekki á neinn hátt kynörvandi lyf, gagnstætt því sem sumir kunna að halda. “Það er algengur miskilningur að inntaka lyfsins hafi í för með sér kynferðislega örvun. Hún þarf annað hvort að verða af völdum hugsana eða utanaðkomandi þátta. Viagra eitt og sér veldur hvorki holdrisi né framlengir það. Viagra getur hins vegar aukið þá vellíðan sem verður við fullnægingu. Það segir sig sjálft að menn eiga meiri möguleika á að fá góða fullnægingu eftir að lyfið fer að virka.”

Menn virðast ekki þurfa að greiða notkun Viagra háu gjaldi, þar sem aukaverkanir eru fáar og vægar að sögn Guðmundar. “Í einstaka tilfellum finna menn fyrir höfuð- og magaverkjum og nefstíflu. Í undantekningartilfellum kvarta menn undan hröðum hjartslætti. Í slíkum tilvikum skal snúa sér strax til læknis. Menn á hjartalyfjum eiga að ráðfæra sig við lækni fyrir notkun Viagra.”

Guðmundi finnst ágætt að þessi atriði komi fram þar sem notendum Viagra fjölgar sífellt á Íslandi. “Menn verða sífellt ófeimnari við að leita sér hjálpar þótt þetta sé enn ákveðið feimnismál. Enda engin ástæða til að skammast sín. Þetta eru karlar á öllum aldri og ástæður stinningarvandans ólíkar. Til okkar leita menn bæði með sálræn og líkamleg vandamál, svo sem karlar nýkomnir úr aðgerðum á líffærum í neðri hluta kviðar. Þá eru reykingar, sykursýki, hátt kólesteról, kvíði og þunglyndi daglegir áhættuþættir. Viagra hefur í mörgum tilvikum reynst góð lausn.

roald@frettabladid.is

Fréttablaðið 08.03.2007