Tæplega 300 kvartanir og kærur bárust til Landlæknis á síðasta ári. Í 90 tilfellum beindust kvartanirnar að Landspítalanum. Einn heilbrigðisstarfsmaður var sviptur starfsleyfinu að hluta til á árinu.
Alls bárust 274 kvartanir og kærur til Landlæknirs árið 2007 sem er svipað hlutfall og árinu áður. Málin eru mis alvarleg, allt frá hnökrum í samskiptum til alvarlegra mistaka.
Kvartanirnar beindust í flestum tilvikum að Landspítalanum, alls 90 talsins. 25 þeirra lutu að bráða- og slysalækningadeild, 18 að skurðlækningadeild, 15 að geðdeild og 14 að lyflækningadeild.
Ef horft er til sérgreina bárust 39 kvartanir vegna heimilislækna og 33 vegna bráða- og slysalækninga og einni færri vegna lyflækninga.
Á heimasíðu Landlæknis kemur fram að afgreiðsla kvartana og kærumála tekur mislangan tíma. Nú um miðjan febrúar höfðu fengist niðurstöður í 209 málum, en 65 málum var þá enn ólokið.
Þegar kvörtunarmáli er lokið er tekin afstaða til þess hvort ástæða sé til aðgerða af hálfu Landlæknisembættisins. Á árinu 2007 var einn heilbrigðisstarfsmaður sviptur starfsleyfi að hluta en tveimur starfsmönnum veitt lögformleg áminning.
Aðfinnslur frá Landlækni voru 20. Í 42 tilvikum sá Landlæknir ástæðu til að koma með ábendingu um að betur mætti fara. Í 131 tilfelli þótti ekki ástæða til neinnar aðgerðar.
www.ruv.is 29.02.2008
