Það er óæskilegt að nýr stjórnandi Landspítalans verði framlenging á embættismannakerfinu og óskandi væri að læknir fái að stjórna spítalanum í framtíðinni. Þetta var meðal þess sem kom fram á opnum fundi læknaráðs Landspítalans í gær.
Nokkurs titrings gætti á fundinum vegna þess að einungis var rætt um mikilvægi þess að læknar hefðu áhrif á spítalanum. Ekki hafi verið minnst á aðra sérfræðinga svo sem hjúkrunarfræðinga.
Þorbjörn Jónsson, formaður læknaráðs Landspítalans, segir fundinn hafa verið haldinn vegna þeirra breytinga sem gerðar hafi verið eftir að Sjálfstæðisflokkurinn tók við ráðuneyti heilbrigðismála.
Þórólfur Þórlindsson, prófessor og forstjóri Lýðheilsustöðvar, tók til máls á fundinum og sagði að starfsfólk ætti auðveldara með að treysta stjórnanda sem hefði reynslu af starfi á spítalanum. Hann sagði óæskilegt að æðsti stjórnandi Landspítalans yrði framlenging á embættismannakerfinu sem undirmaður heilbrigðisráðherra.
Björn Zoëga, bæklunarlæknir og settur forstjóri Landspítalans, telur mikilvægt að læknar fái völd á spítalanum.
www.ruv.is 20.04.2008
