Fram kemur á vef ruv.is að samkvæmt bráðabirgðaniðurstöðum rannsóknar sem verið er að vinna um þessar mundir eru konur sem hafa orðið fyrir líkamlegu- eða kynferðislegu ofbeldi allt að tvöfalt líklegri til að fá hjartaáfall en jafnöldrur sem ekki hafa orðið fyrir ofbeldi.
Bráðabirgðaniðurstöður nýrrar rannsóknar benda til þess að konur sem hafa orðið fyrir líkamlegu- eða kynferðislegu ofbeldi séu allt að tvöfalt líklegri til að fá hjartaáfall en þær sem ekki hafa orðið fyrir ofbeldi. Ekki er vitað hvað veldur þessum tengslum.
Tæplega helmingur íslenskra kvenna hafa orðið fyrir líkamlegu- eða kynferðislegu ofbeldi
Doktorsnemarnir Sigurbjörg Anna Guðnadóttir og Rebekka Sigrún D. Lynch standa fyrir rannsókn þar sem könnuð eru tengsl ofbeldissögu kvenna við hjarta- og æðasjúkdóma. Byggt er á gögnum úr Áfallasögu kvenna, sem er stórt verkefni á vegum Háskóla Íslands þar sem könnuð er tíðni áfalla og áhrif þeirra á heilsufar kvenna. Rebekka segir að þar séu svör frá tæplega þrjátíu og tvö þúsund konum sem gerði þeim kleift að rannsaka tengsl ofbeldis og hjartaáfalla meðal íslenskra kvenna.
„Það fyrsta sem við sáum að næstum 40% íslenskra kvenna hafa orðið fyrir líkamlegu- eða kynferðislegu ofbeldi. Þetta eru sláandi niðurstöður en kannski ekki óviðbúnar,“ segir Rebekka en svipaðar tölur hafi fengist í fyrri rannsóknum bæði hérlendis og erlendis.
Ekki vitað hvað veldur tengslum
„En þessar konur sem hafa orðið fyrir ofbeldi, þær eru með töluvert aukið algengi af hjartaáföllum ef við erum að miða við konur sem hafa ekki orðið fyrir ofbeldi.“ Rebekka segir ekki vitað hvað veldur þessum tengslum.
„Við skoðuðum svona hefðbundna áhættuþætti og þeir skýra þetta samband að hluta, en alls ekki öllu leyti.“ Þeir áhættuþættir eru reykingar, sykursýki og háþrýstingur.
Rannsóknarverkefninu er enn ólokið en bráðabirgðaniðurstöður benda til þess að konur með ofbeldissögu séu allt að tvöfalt líklegri til að fá hjartaáfall en jafnöldrur þeirra sem ekki hafa verið beittar ofbeldi.
Heimild. Vefur Ruv.is
