Nú er ný ríkisstjórn búinn að koma sér fyrir í stólunum og búið að létta af auðmönnum sköttum og gjöldum og þá snýr hún sér að almúganum. Ekki þarf að fara mörgum orðum um fyrstu hjálpar aðgerðir í þágu lyflækningasviðs LSH en þetta hefur farið lægra.
Það bendir semsagt ýmislegt til þess að fulltrúar ríkisstjórnarinnar séu að leggja til að öryrkjar og gamalmenni fari að greiða fyrir heilbrigðisþjónustu sama gjald og aðrir en tryggja eigi hag þeirra öðruvísi.
Katrín Júlíusdóttir, þingmaður Samfylkingarinnar, sem situr í nefnd um greiðsluþátttöku í heilbrigðisþjónustu, telur ólíklegt að samstaða náist um hugmyndir formanns nefndarinnar um að aldraðir og öryrkjar greiði það sama og aðrir fyrir heilbrigðisþjónustu.
Pétur Blöndal, formaður nefndarinnar, sagði í hádegisfréttum að það væri misrétti að sumir þyrftu að greiða fyrir heilbrigðisþjónustu en aðrir ekki. Tryggja ætti hag aldraðra og öryrkja öðruvísi en í gegnum minni kostnaðarþátttöku þeirra í heilbrigðiskerfinu.
Katrín Júlíusdóttir, þingmaður Samfylkingarinnar, sem einnig situr í þessari nefnd, er ósammála þessum hugmyndum. „Ég lít ekki svo á í þessu starfi að það megi verða til þess að niðurstaða þessarar nefndar verði íþyngjandi fyrir einhverja hópa og ég held að það sé ekki viðhorfið almennt innan nefndarinnar að svo eigi að vera,“ segir Katrín.
Katrín er heldur ekki sammála því að leggja eigi innlögn þessa hóps á spítala að jöfnu við aðra hópa. „Ég held að menn séu ekki lagðir inn á sjúkrahúsin í dag nema að brýna nauðsyn krefji. Væntanlega eru það þá sjúklingar sem annaðhvort eru með bráðatilfelli eða sjúklingar sem eru þegar komnir upp í greiðsluþátttökuþakið. Þannig að ég sé ekki að það eigi að breyta neinu.“
Katrín telur ólíklegt að þetta yrði samþykkt, komi slík hugmynd fram í nefndinni. „Í fljótu bragði finnst mér þessi nálgun ekki niðurstaða sem ég gæti sætt mig við í vinnu þessarar nefndar.“
Fréttin er af ruv.is
