Ótrúlegt myndband hefur verið birt á youtube af rússneskum lækni beita hjartasjúkling ofbeldi. Myndbandið sýnir hjartasjúkling nýkomin úr opinni hjartaaðgerð sæta barsmíðum læknisins. Sjúklingurinn var bundinn við rúmið þegar læknirinn sló til hans.
Á myndbandinu sjást einhver orðaskipti áður en læknirinn Andrey Votyakov missir stjórn á sér og barsmíðarnar hefjast. Í rússneskum fjölmiðlum segir að sjúklingurinn, miðaldra karlmaður, hafi látist stuttu eftir að myndirnar voru teknar.
Læknirinn gaf þá skýringar á framkomu sinni að hann hafi verið örmagna eftir 36 tíma vakt. Sjúklingurinn hafi látið móðgandi orð falla um sig og hann hafi misst stjórn á skapi sínu. Hann segist miður sín yfir því sem gerðist og hefur beðið fjölskyldu sjúklingsins afsökunar.
Auk þess lét hann hafa eftir sér að fleiri heilbrigðisstarfsmenn hefðu verið á staðnum en það er ekki að sjá á myndunum.
Andrey á yfir höfði sér ákæru vegna atviksins en honum var umsvifalaust sagt upp störfum. Þeir sem rannsaka atvikið eru jafnframt að kanna hvort sjúklingurinn hafi fengið alla þá meðferð sem möguleg var og hvort hún hafi yfir höfuð verið nógu góð.
Starfsmenn sjúkrahússins hafa nú verið yfirheyrðir og einnig er verið að kanna hvort barsmíðarnar hafi átt þátt í dauða sjúklingsins.
Atvikið átti sér stað í febrúar á þessu ári. Fjölskylda sjúklingsins hefur ekki tjáð sig um málið.
