Hjartamiðstöð Íslands hefur áhuga á að bjóða upp á hjartaþræðingar á hjartamóttöku sinni í Heilsuverndarstöðinni við Barónsstíg. „Við teljum að þörfin sé til staðar og það sé hægt að framkvæma ákveðinn hluta hjartaþræðinga, sem fela í sér minni áhættu, utan spítala,“ segir Axel F. Sigurðsson hjartalæknir hjá Hjartamiðstöðinni og bendir á að undanfarin
tíu ár hafi 150 til 230 manns verið á biðlista eftir hjartaþræðingu. „Ég held að við gætum komið að miklu liði hvað það varðar. Ef við gætum tekið þær þræðingar sem fela í sér minni áhættu þá myndi það létta mjög á spítalanum sem gæti þá einbeitt sér að flóknari og erfiðari verkefnum.“
Aldrei verið gert utan spítala
Axel segir að þó svo hjartaþræðingar hafi aldrei verið gerðar á Íslandi utan Landspítalans og forvera hans sé það mjög algengt erlendis að slíkar aðgerðir séu gerðar utan spítala. „Þar er þetta gert í stórum stíl,“ segir hann og bendir á að við stærstan hluta kransæðaþræðinga þurfi ekki að vera fullbúin skurðstofa til staðar. „Heilsuverndarstöðin er mjög nálægt Landspítalanum. Þannig að það er mjög stutt að fara sem er svona starfsemi alltaf í hag,“ bætir hann við.
Til umræðu í heilbrigðiskerfinu
Axel segir öll áform Hjartamiðstöðvarinnar háð því að góð sátt og samkomulag náist við heilbrigðisyfirvöld. „Við höfum kynnt verkefnið fyrir heilbrigðisyfirvöldum og það er nú farin af stað heilmikil umræða um það,“ segir Axel en
bendir á að enn sé margt ógert. „Það þarf að gera samninga við Landspítalann og heilbrigðisyfirvöld um það hvernig á að standa að þessu og það hefur ekki verið klárað.“
Guðlaugur Þór Þórðarson heilbrigðisráðherra segist ekki geta tjáð sig um málið þar sem það hafi ekki verið kynnt fyrir honum.
24 Stundir 08.07.2008
