Það er algengt að fólk mælist með hærri blóðþrýsting á læknastofu en það gerir heima hjá sér. Þetta kallast „white coat“ háþrýstingur og vísar í það að nærvera læknis eða hjúkrunarfræðings getur valdið aukinni streitu sem hækkar blóðþrýstinginn tímabundið.
En hvernig getur maður vitað hvort um sé að ræða raunverulegan háþrýsting eða aðeins þennan „hvíta slopp“?
Hvað er „white coat“ háþrýstingur?
„White coat“ háþrýstingur lýsir sér þannig að blóðþrýstingur mælist hár á læknastofu en er eðlilegur þegar hann er mældur í rólegu umhverfi heima. Þetta getur valdið ruglingi bæði hjá sjúklingum og læknum því ef aðeins er horft á mælinguna á stofunni gæti fólk fengið greiningu á háþrýstingi sem það í raun ekki hefur.
Hvernig er hægt að greina muninn?
Til að greina hvort þú sért með „white coat“ háþrýsting þarf að gera mælingar utan læknastofu:
- Heimamælingar – Kaupa sér góðan blóðþrýstingsmæli og mæla blóðþrýsting reglulega heima, helst á sama tíma dags, í rólegheitum.
- Sólarhringsmæling (24h) – litið mælitæki sem er borið í beltinu mælir blóðþrýsting allan sólarhringinn, bæði dag og nótt. Þetta er besta og öruggasta leiðin til að greina „white coat“ háþrýsting án nokkurs vafa.
Ef mælingarnar heima eða í sólarhringsmælingu eru eðlilegar, en hækka aðeins á stofu, þá er líklegt að um „white coat“ háþrýsting sé að ræða.
Af hverju skiptir þetta máli?
„White coat“ háþrýstingur er ekki alveg saklaus. Þó að hann sé ekki eins hættulegur og viðvarandi háþrýstingur, þá sýna rannsóknir að hann getur verið áhættumerki fyrir þróun raunverulegs háþrýstings síðar meir. Þess vegna er mikilvægt að fylgjast með og endurtaka mælingar reglulega.
Að lokum
Ef þú hefur áhyggjur af blóðþrýstingnum þínum, ekki láta eina mælingu á læknastofu ráða úrslitum. Biddu um sólarhringsmælingu eða haltu skipulegum heimamælingum áfram. Þannig færðu skýrari mynd af stöðunni og getur tekið upplýstar ákvarðanir um meðferð og lífsstílsbreytingar.
Björn Ófeigs.
Heimildir
Mayo Clinic – White coat hypertension: When blood pressure rises at the doctor’s office
American Heart Association – Monitoring your blood pressure at home
European Society of Cardiology – White-coat hypertension
