Hann Simbi vinur okkar í Hafnarbúðinni á Ísafirði er uppátækjasamur með eindæmum.
Hann heldur úti fésbókarsíðu þar sem hann setur inn skemmtilegar myndir þar sem hann færir athafnir, málshætti, orðtök og tilvitnanir í myndrænt form og á hann sér rúmlega 12.000 aðdáendur.
Sjónarhornið hjá Simba er stundum skrýtið en alltaf skemmtilegt.
Í gær tók hann sig til og skellti sér í hjartaþræðingu eins og meðfylgjandi mynd ber með sér um leið og hann vakti athygli á hjartalíf.is. Það skal þó tekið fram að ekki var um raunverulega hjartaþræðingu að ræða heldur þræddi Simbi hjörtu upp á þráð við stofuborðið heima hjá sér.
Við kunnum honum bestu þakkir fyrir framtakið og vonum að hjartaþræðingin hafi gengið vel og hann hafi þrætt mörg hjörtu.
Hér fyrir neðan eru nokkrar myndir frá Simba.
Smellið á myndirnar ef þið viljið sjá þær stærri.
Simbi málar skrattan á vegginn
Simbi í mæðraskoðun
Simbi í lausu lofti
Simbi rennir blint í sjóinn
Simbi lítur yfir farinn veg
Myndirnar eru af Fésbókarsíðunni hans Simba.
