Hreyfing er eitt besta lyfið sem við eigum fyrir hjartað og hún þarf ekki að vera flókin. Hún styrkir hjartavöðvann, bætir blóðrásina og dregur úr áhættu á hjarta- og æðasjúkdómum.
Ekki þarf að hlaupa maraþon og regluleg hreyfing í hófi skilar mestum ávinningi. Hér eru fjórar tegundir hreyfingar sem rannsóknir sýna að styðja sérstaklega vel við hjartaheilsuna.
1. Ganga
Ganga er einföld, aðgengileg og áhrifarík. Reglulegar göngur lækka blóðþrýsting, bæta blóðsykurstjórnun og auka þol. Gangan þarf ekki að vera löng eða hröð en það að komast reglulega út og hreyfa sig í 20–30 mínútur getur gert gæfumuninn.
2. Hjólreiðar – líka á rafmagnshjóli
Hjólreiðar eru frábær þolþjálfun. Þær draga úr líkum á hjartaáföllum, bæta blóðfitur og styrkja hjarta- og æðakerfið. Rafmagnshjól gera hjólreiðar aðgengilegri fyrir fólk með skerta getu eða hjarta- og stoðkerfisvandamál. Rannsóknir sýna að álagið getur samt verið nægilegt til að efla hjartað, jafnvel þó að mótorinn létti undir í brekkunum. Þetta er því frábært val fyrir þá sem vilja hreyfa sig meira án þess að ofgera sér og mjög auðvelt er að stilla stuðninginn frá rafmótornum.
3. Sund
Sund er létt á liðum og styrkir bæði hjarta og lungu. Það eykur þol, getur lækkað kvíða og streitu og hentar fólki á öllum aldri. Sund er sérstaklega gott fyrir þá sem glíma við stoðkerfisvandamál, þar sem vatnið tekur álagið af líkamanum.
4. Styrktaræfingar
Þó hjartað sé vöðvi, þá styðja styrktaræfingar við almenna heilsu og bæta efnaskipti. Vöðvamassi hjálpar til við að halda blóðsykri í jafnvægi og minnka fitu í kringum líffæri. Það skiptir ekki máli hvort þú notar lóð, eigin líkamsþyngd eða teygjur – reglulegar styrktaræfingar eru lykillinn.
Niðurlag
Þú þarft ekki að velja eina tegund hreyfingar og besta leiðin er að blanda saman ef þess er nokkur kostur. Ganga, hjól, sund og styrktaræfingar eru öll mismunandi leiðir til að styrkja hjartað. Mikilvægast er að finna þá hreyfingu sem þú nýtur og getur stundað reglulega og hjartað þitt mun þakka þér fyrir það.
Björn Ófeigs.
Heimildir
- American Heart Association – Recommendations for Physical Activity in Adults
- Health benefits of electrically assisted cycling: a systematic review (IJBNPA, 2018)
- ResearchGate – Health benefits of electrically assisted cycling: a systematic review
- HealthDay – Your E-Bike Is No Match for Real Biking, Study Finds
- ResearchGate – Impact of electrically assisted bicycles on physical activity and traffic accident risk: a prospective observational study
