Um 60% þeirra sem komu í ókeypis mælingu á blóðþrýstingi og fleiri gildum í boði Hjartaheilla og SÍBS voru með of háan blóðþrýsting. Þetta kom fram eftir að búið var að fara yfir gögnin en 714 einstaklingar nýttu sér þjónustuna.Í fréttatilkynningu segir að þegar mest lét hafi biðröð náð út á götu.
Það voru hjúkrunarfræðinemar, ásamt stafsfólki Hjartaheilla, sem sinntu mælingum. Af þeim 714 sem sem komu voru 43 einstaklingar á hættusvæði. Mörgum var bent á að fara til læknis í framhaldi af mælingunni.
„Mælingar sem þessar benda til þess að skimanir gagnavart lífsstílssjúkdómum eigi fullan rétt á sér, enda má rekja tvo-þriðjuhluta dauðsfalla og drjúgan hluta af örorku til sjúkdóma sem má hafa áhrif á með lífsstíl: mataræði, hreyfingu, áfengis- og tóbaksneyslu, svefnvenjum, streituumhverfi og fleiru.“ segir í tilkynningu frá SÍBS.
Verkefnið var samstarfsverkefni SÍBS, Hjartaheilla og Félags hjúkrunarfræðinema, og er lokapunktur á hringferð um landið þar sem á fimmta þúsund einstaklinga hafa þegið boð um skimun á blóðþrýstingi, blóðfitu- og blóðsykursgildum.
www.mbl.is 01.06.2013
