„Láttu hjartað ráða“, söfnun sem rekstrarfélag Kringlunnar stóð fyrir til stuðnings Neistanum, styrktarfélagi hjartveikra barna skilaði einni milljón króna til Neistans.
Söfnunin var í tilefni 25 ára afmælis Kringlunnar. Söfnunarhjartað var staðsett í hjarta Kringlunnar og var fólk hvatt til að láta 500 kr. af hendi rakna og um leið að lita hjartað rautt.
Stærsta einstaka framlagið í söfnunina kom frá fasteignafélaginu Reitir, sem gaf 250 þúsund krónur í tilefni af 25 ára afmæli félagsins. Framlag Reita nam 10 þúsund krónum á hvert ár félagsins frá stofnun.
Við upphaf söfnunarinnar gáfu Arion banki, Hagkaup og Rekstrarfélag Kringlunnar 25 þúsund krónur. Önnur framlög eru frá viðskiptavinum og starfsfólki, segir í tilkynningu.
www.mbl.is 24.10.2012
