Matreiðslumeistarinn Úlfar Finnbjörnsson sér um sjónvarpsþáttinn Eldað með Holta á ÍNN. Þar eldar hann ljúffenga rétti úr Holtakjúklingi fyrir áhorfendur.
Þættinir eru auk þess aðgengilegir á Hjarta TV hér á hjartalif.is auk þess sem hægt er að fara beint í uppskriftarsafn Holta hér.
Í uppskrift vikunnar frá Holta-kjúklingi færir Úlfar lesendum uppskrift að stórkostlegum reyktum hátíðarfugli með rauðvínssósu frá Holta
- 1 reyktur hátíðarfugl u.þ.b. 2 kg.
- 2 msk. olía
- 1 msk. smjör
- 15 skrældir smálaukar eða tveir venjulegir í bátum
- 15 sveppir
- 1 msk. tómatpuré
- 1/2 flaska rauðvín
- 2-3 timjangreinar eða 1 tsk. þurrkað
- 3-4 lárviðarlauf
- 1/2 tsk. nýmulinn pipar
- 1 msk. kjúklingakraftur
- 2 dl vatn
- Sósujafnari
- 50 g kalt smjör í teningum
Setjið fuglinn í eldfast mót. Kraumið lauk og sveppi í olíu og smjöri í potti í 2 mínútur. Bætið þá tómatpuré, rauðvíni, lárviðarlaufum, timjan og pipar í pottinn og sjóðið í 1 mínútu. Hellið þá úr pottinum í eldfasta mótið og færið í 170°C heitan ofn. Bakið í 40 mínútur, snúið þá fuglinum við og látið hann liggja á bringunni í 40 mínútur í viðbót eða þar til kjarnhiti sýnir 71°C.
Sigtið allan safa úr eldfasta fatinu í pott og bætið vatni saman við ásamt kjúklingakrafti og þykkið með sósujafnara. Takið þá pottinn af hellunni og bætið smjöri, í teningum, saman við. Hrærið þangað til smjörið hefur bráðnað. Eftir það má sósan ekki sjóða. Berið fuglinn fram með sósunni og t.d. sætri kartöflumús og salati.
