Blóðþrýstingur er eins og vatnsþrýstingur í lögnum, hann þarf að vera nægur til að halda góðu rennsli en ekki svo miklum að hann valdi skemmdum á lögnunum.
Margir geta lækkað blóðþrýstinginn umtalsvert án lyfja með markvissum lífsstílsbreytingum. Rannsóknir á DASH-mataræðinu (Dietary Approaches to Stop Hypertension) hafa sýnt að mataræði, hreyfing og saltnotkun skipta sköpum.
Minnkun á salti – fyrsta skrefið
DASH-rannsóknir sýna að með því að minnka salt úr um 9 grömmum á dag í um 5–6 grömm getur lækkað blóðþrýsting um 5–6 mmHg. Það þýðir að velja ferskan mat fram yfir pakkavöru, nota krydd og jurtir í stað salts, og smakka matinn áður en þú grípur í saltstaukinn.
Ávextir og grænmeti – náttúruleg hjartavernd
Ávextir og grænmeti eru rík af kalíum, magnesíum og trefjum sem styðja við heilbrigðan blóðþrýsting. Í DASH-mataræðinu er mælt með 8–10 skömmtum á dag, það má vera handfylli af berjum í morgunmat, gulrót með hádegismat eða salat með kvöldmat. Kalíum hjálpar til við að jafna út áhrif natríums í líkamanum.
Hreyfing – hreyfðu þig reglulega
Að ganga rösklega 30 mínútur á dag, hjóla eða synda getur lækkað blóðþrýsting um 4–9 mmHg. Það þarf ekki að vera allt í einu og þú getur skipt því upp í 10 mínútna lotur yfir daginn ef það hentar betur. Fyrir hjartasjúklinga er mikilvægt að hreyfingin sé í samræmi við ráðleggingar læknis.
Smá breytingar, mikill ávinningur
Ef þú blandar þessum þremur þáttum saman, minna salt, meira af plöntufæði og reglulega hreyfingu, getur þú náð árangri sem er sambærilegur við áhrif lyfja hjá sumum. Og jafnvel þótt þú sért á blóðþrýstingslyfjum getur þetta hjálpað til við að halda þrýstingnum stöðugum og hugsanlega minnkað þörf fyrir hærri lyfjaskammta.
Björn Ófeigs.
Heimildir:
- Wikipedia – DASH diet
- EatingWell – What to avoid to reduce stroke risk
- National Heart, Lung, and Blood Institute – DASH Eating Plan
