Auknar líkur á læknamistökum

Læknar á Landspítala segjast ekki geta lokið verkefnum á fullnægjandi hátt vegna mikils vinnuálags. Formaður læknaráðs segir að þetta auki líkur á læknamistökum.
Stærsta deild Landspítalans, lyflækningadeild, var rekin allt síðasta ár með of fáum unglæknum en tíu til tólf vantaði svo deildin væri fullskipuð. Þetta kom fram í máli Steins Jónssonar, sérfræðings við deildina, í viðtali við RÚV í gær. Hann benti á að nýleg könnun hefði leitt í ljós að læknarnir kvarti undan vinnuálagi. Vilhelmína Haraldsdóttir, framkvæmdastjóri lyflækningasviðs, segir að álagið sé mikið á öllum læknum sviðsins. Mikið hafi verið að gera, einkum undanfarnar vikur og mikið verið um veika sjúklinga. Starfsfólk lyflækningasviðs hafi fundið fyrir því að sviðið sé ekki eins vel mannað og verið hafi.

Vilhelmína segir að reynt sé að vinna sem best úr stöðunni en hún sé þó áhyggjuefni. Það þurfi alltaf að hafa áhyggjur þegar mikið sé að gera og mikið álag sé á starfsfólkinu.

Þorbjörn Jónsson, formaður læknaráðs Landspítalans tekur undir það. Í könnuninni hafi komið fram að læknar segjast ekki geta lokið verkefnum á fullnægjandi hátt. Þegar færri vinni verkin þurfi menn hreinlega að vinna hraðar og lengur. Þá sé kannski ekki nægilega mikill tími til að liggja yfir hverju verki og hverri ákvörðun.

frettir@ruv.is

www.ruv.is 12.02.2011

DEILA
Fyrri greinGestagangur
Næsta greinLíkur á hjartaáfalli aukast
Björn er ritstjóri og ábyrgðarmaður hjartalif.is með brennandi áhuga á hjartans málefnum auk þess að vera sjálfur hjartabilaður og með gangráð/bjargráð.