Sigurður Guðmundsson, landlæknir og verðandi forseti heilbrigðisvísindasviðs Háskóla Íslands, segist kveðja landlæknisembættið með miklum söknuði. Hann segist þó hlakka mikið til að takast á við ný verkefni í háskólanum og að þar sé mikið verk fyrir höndum, enda hafi skólinn einsett sér að skipa sér á bekk með þeirra allra bestu í heiminum.
Að sögn Sigurðar gefur nýja fyrirkomulagið á heilbrigðisvísindasviði kleift að efla samstarf á milli deilda innan heilbrigðisvísindanna. Auk þess gefist ný tækifæri til samvinnu við erlenda skóla og erlenda fræðimenn.
„Ég kveð gamla starfið með mjög miklum söknuði. Ég hef nú samt verið svolítið upptekinn af því að menn eigi nú ekki að vera of lengi að störfum. Ég er búinn að vera í þessu í tíu ár og það fer að koma að því að ráðningartíminn renni út í vetur,” segir Sigurður. Hann gerir ráð fyrir að láta af störfum landlæknis fyrir 1. nóvember.
www.visir.is 09.09.2008
