Nefnd um byggingu hátæknisjúkrahúss hefur verið lögð niður. Þetta var eitt af síðustu embættisverkum Guðlaugs Þórs Þórðarsonar, fyrrverandi heilbrigðisráðherra. Inga Jóna Þórðardóttir var formaður nefndarinnar. Ekki hefur þó verið hætt við byggingu hátækisjúkrahúss.
Undirbúningsvinnan flyst til Landspítalans. Á vef spítalans kemur fram að Ingólfur Þórisson, framkvæmdastjóri tækni og eigna hjá Landspítalanum, hafi umsjón með undirbúningnum.
Í minnisblaði til forstjóra Landspítalans kemur fram að mikilvægt sé að halda áfram áformum um byggingu sjúkrahússins enda náist fram sparnaður til lengri tíma með því að reka Landspítalann í einni, nýrri byggingu. Sparnaðurinn er áætlaður 3 til 5 milljarðar á ári.
Sem dæmi um óhagræði af dreifðri starfsemi má nefna að bráðamóttökur eru fimm talsins, bráðaskurðaðgerðum er sinnt á fimm stöðum og reknar eru tvær gjörgæsludeildir. Vegna þessa þarf að reka rannsókna og myndgreiningarþjónustu á tveimur stöðum. þá er aukin hætta á spítalasýkingum í gömlu húsnæði spítalanna.
Í bréfi til forstjóra Landspítalans féllst Guðlaugur Þór á beiðni spítalans um að hann nýti eigin krafta til undirbúningsvinnunnar. Landspítalinn fari sjálfur yfir stöðuna og meti kostnað. Landspítalinn nefni að minnsta kosti tvær leiðir til að draga úr kostnaði og leggi fram framkvæmdaáætlun sem tryggi byggingu nýs Hátæknisjúkrahúss.
www.ruv.is 27.02.2009
