„Hrjótandi maki eykur líkur á háum blóðþrýstingi,“ segir Harriet Akre, yfirlæknir á svefnrannsóknastofu á Lovisenberg sjúkrahúsinu í Noregi í samtali við norska blaðið VG. Akre segir niðurstöður nokkurra rannsókna allar vísa í sömu áttina.
Rannsóknirnar gefa til kynna að það sé fyrst og fremst hljóðmengun sem skapi áhættuna á hærri blóðþrýstingi og því eigi það sama við um fólk sem býr í nágrenni við flugvelli.
„Það kemur á daginn að þar sem hávaðinn er mestur eykur það magn stresshormóna í líkamanum sem aftur valda hærri blóðþrýstingi. Þeir sem hrjóta sjálfir eru þess vegna í jafn mikilli áhættu og hinir, sem sofa í nágrenninu,“ segir Akre.
Samkvæmt rannsóknum Lars Jarup við Imperial-háskólann í Lundúnum er hávaði yfir 35 desibelum á meðan sofið er, hættulegur heilsunni. Hávaði frá hrotum er að jafnaði á bilinu fjörtíu til sextíu desibel.
www.dv.is 19.02.2008
