Kamila Skolimowska, frá Póllandi, sem vann til gullverðlauna í sleggjukasti á Ólympíuleikunum í Sydney árið 2000 lést í Portúgal í gær, 26 ára gömul. Hún var þar stödd í æfingabúðum með pólska landsliðinu.
Skolimowska, sem keppti á Ólympíuleikunum í Peking síðastliðið sumar, leið eitthvað illa á æfingu í Portúgal í gær og var flutt með sjúkrabifreið á sjúkrahús. Á leiðinni þangað missti hún meðvitund og lést skömmu síðar.
,,Kamila kom til okkar og sagðist líða illa. Við hringdum þegar í stað á sjúkrabíl og hún gat gengið sjálf inni í hann. Á þriðjudaginn kvartaði hún yfir verkum í fótum og töluðu læknar um að hugsanlega hefði hún fengið hjartaáfall,“ sagði Szymon Ziolkowski við fréttamenn en hann vann gullið í karlaflokki í sleggjukasti á Ólympíuleikunum í Sydney.
Kamila Skolimowska var fædd í Varsjá í Póllandi 4. nóvember 1982. 13 ára gömul varð hún yngsti meistari Póllands í sleggjukasti og í tvígang setti hún heimsmet í unglingaflokki. Hún vann gullverðlaunin á Ólympíuleikjunum í Sydney þegar hún þeytti sleggjunni 71,16 metra. Hún keppti á Ólympíuleikunum í Aþenu 2004 og varð í fimmta sæti þar sem hún kastaði lengst 72,57 metra. Á Ólympíuleikjunum í Peking á síðasta árið náði hún sér ekki á strik og komst ekki í úrslit.
www.mbl.is 19.02.2009
