Sú framkvæmd sem stjórnvöld vilja helst að lífeyrissjóðirnir fjármagni á næstunni er bygging nýs háskólasjúkrahúss. Slík framkvæmd tryggir fjölda fólks atvinnu, ekki síst fólk með tæknimenntun.
Það var seint í júní síðastliðnum sem skrifað var undir svokallaðan stöðugleikasáttmála. Hluti af honum var áætlun um að lífeyrissjóðirnir kæmu að því að fjármagna framkvæmdir hér á landi. Í kjölfarið voru stofnaðir tveir vinnuhópar. Annarsvegar er það hópur á vegum lífeyrissjóðanna og hinsvegar hópur á vegum stjórnvalda. Hlutverk þeirra er að velja verkefni sem lífeyrissjóðirnir fjármagni. Lítið hefur borið á niðurstöðum í málinu en nú gæti orðið breyting þar á.
Álfheiður Ingadóttir, þingmaður Vinstri grænna og fulltrúi í vinnuhópi stjórnvalda, segir verið að skoða sérstaklega mögulega aðkomu lífeyrissjóðanna að byggingu Háskólasjúkrahússins. Sú framkvæmd muni skila mjög miklum arði eða tæpum 2 milljörðum á ári eftir að sjúkrahúsið hefur verið byggt. Þá sé bygging nýs háskólasjúkrahúss gríðarleg framkvæmd.
Gert er ráð fyrir að kostnaður á þeim áfanga sem nú er rætt um nemi um 45 milljörðum króna. Til samanburðar má geta að tónlistarhúsið í Reykjavík mun kosta tilbúið 23 til 25 milljarða. Svona stórar framkvæmdir eiga það sameiginlegt að tryggja fjölda fólks atvinnu
Álfheiður segir að um sé að ræða gríðarlega mörg ársverk og fjölbreyttan mannafla þurfi til verksins. Fyrst um sinn yrði þörf á fólki í tæknistörf, það er arkitekta, verkfræðinga og svo framvegis.
www.ruv.is 06.09.2009
