Það er hættulegt að vera of feitur. Þetta sýnir ný viðamikil rannsókn sem gerð hefur verið í Uppsölum í Svíþjóð. Hættan á hjartaslagi, og öðrum alvarlegum áföllum er helmingi meiri hjá feitum en öðrum.
Rannsókn vísindamanna við Stofnun um almannaheilsu við háskólann í Uppsölum náði til 1800 manna og stóð í 30 ár. Niðurstaðan er sú að öllum þeim sem eru yfir kjörþyngd, of þungum og of feitum er ráðlagt að grennast og léttast.
Fram kom að það er hættulegt að að vera of þungur og feitur jafnvel þó rannsóknir sýni ekki of mikla fitu í blóði, of háan blóðþrýsting eða of mikinn sykur í blóði.
Dagblaðið Upsala Nya Tidning greinir frá megin niðurstöðum rannsóknarinnar þar sem fram kemur að hættan á hjartaáfalli, er helmingi meiri og hætta á heilablóðfalli og hjartastoppi er einnig helmingi meiri hjá feitum en þeim sem eru í kjörþyngd.
Í Bretlandi hafa stjórnvöld gripið til aðgerða til að auka almannaheilsu með því að draga úr offitu, m.a með því að banna skyndibita ruslfæðu í mötuneytum skóla.
BBC greinir frá því í dag heilstutjón af völdum óhollustu eins og offitu fari vaxandi. Þannig séu nú tvær milljónir og 350 þúsund íbúar á Bretlandi með áunna sykursýki, sykursýki tvö, sem tengd er offitu. Þetta fólk sé í meiri hættu en aðrir að fá hjartaslag og blóðtappa og skurðgerðum þar sem nema þurfi burt hluta af fótum fólks vegna sykursýki hafi fjölgað um 43% á tíu árum.
www.ruv.is 29.12.2009
