Bandaríski leikarinn John Travolta segir að hann og fjölskylda sín séu í sárum vegna andláts 16 ára gamals sonar þeirra.
Jett Travolta fannst meðvitundarlaus á heimili fjölskyldunnar á Bahama-eyjum á föstudag. Hann var í fríi með föður sínum, móður sinni, leikkonunni Kelly Preston, og systur sinni, Ella Blue, þegar hann lést.
„Við erum niðurbrotin yfir því hve tíminn með honum var stuttur,“ segir leikarinn. „Við munum varðveita þær stundir sem við áttum með honum til æviloka,“ segir á vefsíðu leikarans.
Jett þjáðist af Kawasaki-heilkenni sem getur leitt til hjartasjúkdóma.
„Jett var yndislegasti sonur sem tveir foreldrar gætu nokkurn tíma eignast og hann lýsti upp tilveru allra sem hann hitti,“ segir Travolta.
„Við höfum fengið mörg samúðarskeyti hvaðanæva úr heiminum og við viljum þakka öllum fyrir bænir þeirra og stuðning.“
www.mbl.is 05.01.2009
