Sænskar konur sem borðuðu einn til tvo skammta af dökku súkkulaði á viku fengu í einum þriðja tilfella sjaldnar hjartabilun en þær sem borðuðu ekki þetta magn af súkkulaði. Samkvæmt rannsókninni voru engin varnaráhrif fyrir þær konur sem borðuðu súkkulaði á hverjum degi eða nánast á hverjum degi.
Rannsóknin birtist um miðjan ágúst í tímaritinu Circulation: Heart Failure. Tíðni hjartabilunar var skoðuð í 31.823 sænskum konum á aldrinum 48-83 ára sem höfðu fyllt út spurningarlista um mataræði, fylgst var með konunum á árunum 1998-2006.
Konur sem borðuðu einn til þrjá skammta af súkkulaði á mánuði voru með 26% færri tilfelli hjartabilana og þær sem borðuðu einn til tvo skammta á viku voru með 32% færri tilfelli.
Fræðingar leiða líkur að því að efni í súkkulaðinu lækki blóðþrýstinginn og dragi því úr áhættu á hjartabilun.
Þær konur sem komu best út úr rannsókninni borða einn til tvo skammta, sem eru 19 til 30 grömm, af dökku súkkulaði á viku. Dökkt súkkulaði í Svíþjóð inniheldur a.m.k. 30% kakó.
Morgunblaðið 25.08.2010
