Ómissandi þáttur í starfsemi Landspítala er stuðningur félagasamtaka við einstakar deildir og er óhætt að fullyrða að án stuðnings þeirra væru aðstæður sjúklinga svipur hjá sjón.
Þetta gildir ekki síst um hjartadeildina á LSH en Hjartaheill færðu Hjartadeildinni góða gjöf í gær.
Samtökin færðu deildinni húsbúnað í seturstofur deildarinnar.
Hjartaheill hafa verið dugleg að styðja við deildina með gjöfum og hafa auk þessa gefið húsbúnað í aðstandenda herbergi, sjónvörp við hvert rúm á deildinni og fjölmargar tækjagjafir eins og hjartaþræðingartæki, ómtæki og fleiri smátæki.
Það er líka merkileg staðreynd að um 2400 manns leggjast inn á hjartadeildina á hverju ári eða um 200 manns í hverjum mánuði sem gerir að meðaltali 6 einstaklingar á dag.
Þarna er mannslífum bjargað á hverjum degi og þrátt fyrir að stundum sé þröngt setinn bekkurinn er reynt að hlúa vel að öllum.
Óhætt er að fullyrða að þarna er unnið frábært og óeigingjarnt starf af starfsfólki sem ber hag skjólstæðinga sinna fyrir brjósti.
Það er þessa vegna frábært að samtök hjartasjúklinga geti stutt dyggilega við deildina með framlögum sínum til að betur fari um sjúklinga og aðstandendur.
Það er rétt að vekja athygli á því að það væri heillaráð fyrir hjartafólk að ganga til liðs við samtökin og veita þeim liðsinni með félagsaðild.
Stuðningur þinn yrði vel þeginn.
Hér er hægt að fá upplýsingar um hvernig hægt er að leggja félaginu lið.
Mynd: Af vef Hjartaheilla.
