Góðtemplarareglan á Akureyri afhenti Fjórðungssjúkrahúsinu á Akureyri (FSA) í dag 50 milljónir króna að gjöf til stofnunar á sérstökum sjóði sem varið verður til kaupa á tækjum og búnaði til greiningar og meðferðar hjartasjúkdóma á FSA. Hér er um að ræða einhverja alstærstu gjöf sem FSA hefur fengið frá upphafi.
„Gjöf okkar til Sjúkrahússins á Akureyri fylgir sú einlæga ósk og von að hún komi að sem bestum notum fyrir fólkið sem þangað leitar, en margt af því hefur efalaust tekið þátt í stúkustarfi á sínum yngri árum,“ segir Árni Valur Viggósson, stjórnarformaður Góðtemplarareglunnar á Akureyri.
„Þessi gjöf hefur gríðarlega mikla þýðingu fyrir Sjúkrahúsið á Akureyri og þá starfsemi sem hér fer fram, því hún stóreykur möguleika okkar á að greina, rannsaka og fást við hjartasjúkdóma. Við erum Góðtemplarareglunni á Akureyri mjög þakklát fyrir þessa höfðinglegu gjöf. Hún kemur í góðar þarfir,“ segir Halldór Jónsson, forstjóri FSA.
www.mbl.is 04.02.2008
