Við fjöllum reglulega um ýmsar hliðar gáttatifs og að þessu sinni fjöllum við um meðferð við gáttatifi og þau úrræði sem í boði eru.
Markmið meðferðarinnar er að ná stjórn á takti eða hjartsláttarhraða og draga úr hættu á fylgikvillum. Rétt er að vekja athygli á myndskeiðinu með Davíð O. Arnar hjartalækni hér fyrir neðan sem gerð voru af Íslenskri Erfðargreiningu.
Gáttatif (atrial fibrillation) er mjög algeng hjartsláttartruflun. Í stuttu máli lýsir gáttatif sér þannig að mjög tilviljanakennd rafboð fara þá um gáttir hjartans og keppa um leiðni gegnum AV-hnútinn. Þetta veldur því að hjartsláttur verður mjög óreglulegur og oftast hraður.
Meðferð
Markmið meðferðar við gáttatifi er að stjórna takti og/eða hjartsláttarhraða og að draga úr hættu á fylgikvillum. Við val á meðferð er tekið tillit til þess hve lengi gáttatifið hefur staðið yfir, hvort það er viðvarandi eða í köstum, áhrif þess á daglegt líf einstaklingsins og hversu alvarleg einkennin eru. Lyf eru notuð til að hafa áhrif á hraða og takt hjartsláttar. Í sumum tilvikum þarf að gera rafvendingu en þá er rafstuði beitt til að koma aftur á sínus takti. Í vissum tilfellum er einnig hægt að reyna aðgerð til að brenna fyrir óregluleg rafboð gáttatifs, svokallaða lungnavenubrennslu.
Blóðþynningarlyf
Blóðþynningarlyf eru ekki meðferð við gáttatifi, heldur draga þau úr líkum á að blóðsegar myndist í hjartanu. Blóðþynningarmeðferð getur aukið hættuna á blæðingum og meðferðin því ekki áhættulaus. Það er því oft nauðsynlegt að hætta á blóðþynningarlyfinu fyrir skurð- eða tannaðgerðir en það skal ávallt gera í samráði við lækni. Blóðþynningarmeðferð með kóvar krefst reglubundinna blóðprufa svo hægt sé að skammta lyfið rétt.
Hér fyrir neðan er síðan myndskeið þar sem Davíð O. Arnar yfirlæknir á Landspítalanum fer yfir meðferð og úrræði.
Björn Ófeigs.
Munið eftir að læka við okkur á Facebook
