Hjartasjúklingur furðar sig á því að ríkið niðurgreiði aðeins eitt blóðfitulækkandi lyf. Blóðfita mannsins jókst mikið þegar hann var settur á ódýrt lyf eftir að ríkið hætti að niðurgreiða dýrara lyfin.
Haraldur Haraldsson fékk hjartaáfall fyrir nokkrum árum og hefur þurft að reiða sig á lyf til að lækka blóðfituna. Hann kveðst hafa farið í tvær blástursaðgerðir og síðan hjáveituaðgerð. Hann sé hjartveikur því komnar séu skemmdir í hjartað.
Haraldur var settur á ódýrt blóðfitulækkandi lyf sem nefnist Zokor. Það reyndist ekki nógu vel því blóðfitan var alltof mikil, en læknar telja að blóðfitan, hjá þeim sem hafa fengið hjartaáfall, megi ekki vera hærri en gildið fjórir. Haraldur var settur á nýtt lyf, Crestor, og við það lækkaði blóðfitan. Hún lækkaði síðan enn meira þegar skammturinn var tvöfaldaður. Fyrir tveimur árum hætti ríkið að niðurgeiða Crestor og þá var Haraldur settur aftur á ódýru lyfin.
Þó svo að sá skammtur væri tvöfalt sterkari en Crestor-skammturinn jókst blóðfitan mikið. Eftir hátt í tvö ár á þessum lyfjum reyndist heilsu Haraldar hafa hrakað til þess að veita mætti honum lyfjaskírteini og þannig Crestor lyfið.
Haraldur segir að ef læknir sé búinn að finna lyf sem passi meðferðinni þá eigi skilyrðislaust að leyfa sjúklingi að nota það. Að taka lyf af mönnum sé vís aðferð til að drepa menn.
Umfjöllun í fréttatíma sjónvarpsins um málið hér
www.ruv.is 30.03.2011
