Hulda Gunnlaugsdóttir, forstjóri Landspítalans, segir í orðsendingu á vef spítalans að hugmyndir að aðgerðum til að lækka útgjöld stofnunarinnar verði kynntar sviðsstjórum eftir helgina og útfærðar nánar að því loknu. „Enn hefur því ekkert verið ákveðið og rétt er taka fram vegna fréttar sem birtist á Stöð 2 þriðjudagskvöldið 18. nóvember að hvorki hefur verið ákveðin launalækkun né uppsagnir,“ segir m.a. í orðsendingunni.
Hulda segir hins vegar horft til þess að hægt verði að hagræða í starfseminni, „til dæmis með því að fækka legudögum og minnka launakostnað. Megin verkefnið er þannig að ná stjórn á kostnaði í rekstri Landspítala með hagræðingu.“
Tilefni orðsendingarinnar er að fjármálaráðuneytið sendi föstudaginn 14. nóvember 2008 öllum ráðuneytum beiðni um að skoðaðir yrðu möguleikar á 10 prósenta lækkun útgjalda á næsta fjárlagaári vegna þeirra erfiðleika sem íslenskt þjóðfélag glímir við. Heilbrigðisráðuneytið framsendi bréfið til spítalans samdægurs.
Að sögn Huldu hefur framkvæmdastjórn Landspítala haft fjögur atriði að leiðarljósi við að koma til móts við ósk ráðuneytisins. Þau eru að fækka legudögum, að minnka launakostnað, að minnka rekstrarkostnað og að auka tekjur. Leitast verður við að uppfylla þessi markmið með því að ná sem bestri stjórn á öllum kostnaðarliðum í starfsemi Landspítala með hagræðingu þar sem nokkur möguleiki er á að koma henni við. „Þetta vill framkvæmdastjórn vinna í góðu samstarfi við stjórnendur og annað starfsfólk spítalans,“ segir m.a. í orðsendingu forstjórans.
www.mbl.is 19.11.2008
