Svalandi í sólinni

Í góðu sumarveðri getur þörfin fyrir frískandi svaladrykk orðið mjög aðkallandi. Við slíkt tilefni kom til mín hugmynd að ferskum basil-mojito. Innblásturinn kom í gegnum ofgnótt af ferskri basilíku í glugganum! Mmmm… basil-ilmurinn er svo seiðandi, minnir á ekta ítalska matargerð og ljúfa sumargolu! Hér að neðan finnið þið uppskriftina ásamt fleiri hugmyndum sem eru innblásnar af sumarsólinni og töfrum basilíkunnar.

Sólskinskveðja Solla ¨*•.¸¸☼

Margföld basil uppskera Þessar myndarlegu basilplöntur dafna vel í stofuglugganum.Ég kaupi stundum lífræna basilíku í potti frá Engi (fæst í mörgum stórmörkuðum, t.d. Hagkaup). Þegar ég hef notað það sem ég þarf í matinn umpotta ég afgangs stilkunum, set 2-4 stilka saman í stærri blómapott og útí glugga. Þannig margfaldast uppskeran, tvö lítil lauf á stilk verða að stórri og myndarlegri plöntu með risavöxnum basilblöðum. Þetta er voða einfalt og alls ekkert maus, ég skrepp bara útí garð og næli mér í smá mold til að fylla uppí pottinn. Ég hef tekið eftir því að í of litlum blómapotti vaxa plönturnar mun hægar og ná ekki að verða mjög stórar. Ræturnar þurfa pláss og þeim líður greinilega best þegar stilkarnir eru ekki of margir í hverjum potti. Auðvitað er líka mjög skemmtilegt að sá fræjunum sjálfur, en þetta er hugmynd fyrir þá sem mega ekki vera að því að bíða… Ef þú ert jafn hrifin/n af basilíku og ég þá hvet ég þig til að prófa! - Auglýsing- * Klassískt pestó – uppskrift fyrir þá sem eiga nóg af basilíku!

Svalandi vatnsmelónudrykkur Afhýðið væna sneið af vatnsmelónu, steinhreinsið, setjið í blandara, blandið og hellið síðan í glas og njótið!