Söngur er gamalt listform sem hefur verið notað í gegnum aldirnar til að tjá tilfinningar og auka samkennd. Þó flestir tengi söng við skemmtun er gaman að velta fyrir sér heilsufarslegum áhrifum þess að syngja saman.
Kórsöngur sameinar einstaklinga í samhljómi og getur verið sérstaklega áhrifamikill, heilandi og getur haft góð áhrif bæði líkamlega og andlega.
Kórsöngur og hjartaheilsa
Rannsóknir sýna að kórsöngur getur haft jákvæð áhrif á hjartaheilsu. Söngur eykur blóðflæði og lækkar blóðþrýsting sem skiptir máli fyrir einstaklinga með hjarta og æðasjúkdóma. Þegar við syngjum erum við að virkja virkja lungun sem eykur súrefnismettun í blóði. Þetta hefur í för með sér að hjartað puðar minna sem leiðir til lægri blóðþrýstings.
Kórsöngur felur einnig í sér samveru sem getur haft jákvæð áhrif á hjartaheilsu. Það að vera hluti af kór svo dæmi sé tekið bætir félagsleg tengsl og býr til stuðningsnet sem er mikilvægt fyrir hjartaheilsu. Félagsleg einangrun er þekktur áhættuþáttur fyrir hjartasjúkdóma, og kórsöngur býður upp á tækifæri til að mynda dýrmæt tengsl við aðra sem eykur samkenndina.
Andleg heilsa og kórsöngur
Kórsöngur hefur ekki aðeins jákvæð áhrif á líkamlega heilsu heldur einnig á andlega heilsu. Söngur losar endorfín sem eru náttúrulegt vímuefni líkamans sem kallar fram djúpa vellíðan. Þetta hjálpar til við að draga úr streitu og kvíða sem eru stórir áhættuþættir fyrir þá sem þjást af hjarta og æðasjúkdómum.
Í rannsókn á kórsöng var komist að því að þátttakendur skoruðu hærra í andlegri vellíðan og skynjun á lífsgæðum eftir að hafa sungið saman. Kórsöngur styrkir einnig sjálfsmyndina, eykur sjálfstraustið og skapar samkennd sem getur dregið úr þunglyndi og öðrum andlegum vandamálum. Þannig getur kórsöngur ekki aðeins bætt líkamlega heilsu heldur einnig andlega líðan, sem er mikilvægt fyrir heilsu hjartans.
Að lokum
Kórsöngur er ekki bara skemmtun, það er kraftmikið tæki fyrir betri heilsu. Með því að sameina líkamlegar og andlegar forsendur er söngur góð leið til að stuðla að heilbrigðu hjarta og góðri almennri líðan. Þeir sem syngja í kór eru ekki aðeins að njóta tónlistarinnar heldur eru þeir einnig að bæta lífsgæði sín. Þannig er það skynsamlegt að huga að kórsöng sem hluta af heilsusamlegum lífsstíl og betri lífsgæða.
Björn Ófeigs.
