Taka ætti verkjalyfið díklófenak af markaði, að mati vísindamanna sem hafa birt rannsókn um notkun bólgueyðandi lyfja.
Díklófenak-lyfið Voltaren er með algengustu verkjalyfjum á Íslandi en samkvæmt rannsókninni ber notkun díklófenaks með sér álíka hættu á hjartaáfalli og af lyfinu Vioxx sem var tekið af markaði árið 2004.
Díklófenak er meðal annars notað við gigtverkjum, höfuðverk og tíðaverkjum. Það er selt á Íslandi meðal annars undir heitunum Voltaren og Vóstar. Það tilheyrir svokölluðum NSAID-lyfjum sem eru bólgueyðandi lyf sem ekki eru sterar. Önnur slík lyf eru til dæmis naproxen – og íbúprófen eða íbúfen. Voltaren var þriðja mest selda verkjalyfið á Íslandi í dagskömmtum talið árið 2011, á eftir Íbúfeni og Paratabs. Rannsóknir gefa til kynna að notkun díklófenaks auki hættuna á að fá hjartaáfall álíka mikið og lyfið Vioxx sem var tekið af markaði árið 2004.
Samkvæmt rannsókn sem birtist í fræðiritinu PLOS Medicine, og breska ríkisútvarpið fjallar um, er díklófenak meira notað á heimsvísu en sambærileg lyf eins og íbúprófen og naproxen, þótt díklófenak hafi í för með sér meiri hættu á hjartaáföllum. Rannsóknin náði til fimmtán landa. Vísindamennirnir telja að niðurstöðurnar gefi tilefni til að taka lyfið af markaði um allan heim.
Fram kom í fréttum RÚV í fyrra að Íslendingar notuðu díklófenak-lyf meira en aðrar Norðurlandaþjóðir. Gunnar Gíslason, sérfræðingur í hjartasjúkdómum í Kaupmannahöfn, hefur rannsakað díklófenak lengi og einnig talað fyrir því að það verði tekið af markaði.
Lyfjastofnun Evrópu rannsakar nú aukaverkanir díklófenaks. Í tilkynningu frá stofnuninni segir að nýjustu rannsóknir styðji þá kenningu að notkun díklófenak-lyfja hafi í för með sér aukna hættu á hjartaáföllum. Tekið er fram að vísbendingar séu um að þessi aukna hætta sé þó fremur lítil.
www.ruv.is 17.02.2012
