“Ég er á móti flötum sparnaði. Ég vil heldur að fólkið á gólfinu sé virkjað til að sjá út lausnir sem leiða til meiri nýtingu og minni fjárútláta,” segir Gunnar Skúli Ármannsson, sérfræðingur á svæfingar- og gjörgæsludeild Landspítalans. Sjálfur hefur Gunnar sparað Landspítalanum rúmar sjö milljónir síðustu fimm ár með einföldum breytingum sem sjúklingar og starfsmenn kunna vel að meta.
“Þegar ég kom frá Svíþjóð árið 1999 var einhverra hluta vegna komin upp sú hefð á spítalanum að tveir parkódin-stílar voru settir upp í endaþarm allra fullorðinna sjúklinga sem skornir voru þar upp,” segir Gunnar sem velti því fyrir sér hvers vegna þetta væri gert bæði vegna þeirra óþæginda sem stílainngjöfin gat valdið sjúklingum og starfsfólki auk þess sem hann taldi mörg önnur lyf heppilegri fyrir sjúklinga.
Fyrir fimm árum kom hann því svo til leiðar að nú fá þeir sem fara í aðgerð á spítalanum tvær töflur af panódíl. Bendir hann á að ef miðað sé við að 12.000 sjúklingar fái tvo parkódín-stíla kosti það ríkið yfir árið 1.413.600 krónur á ári en fái þeir allir tvær panódíl sé kostnaðurinn vegna þess 41.280 krónur á ári. Með breytingunni sparist því 1,3 milljónir króna árlega án nokkurra óþæginda, þvert á móti.- kdk
Fréttablaðið 10.04.2008
