Útlit er fyrir að hjúkrunarfræðingar neiti að vinna yfirvinnu eftir árangurslausan fund með samninganefnd ríkisins, segir Elsa B. Friðfinnsdóttur, formaður Félags íslenskra hjúkrunarfræðinga. Neyðarástand skapast strax á fyrstu dögum, segir Kristín Sigurðardóttir, deildarstjóri á Landspítalanum. Hún segir útlitið dökkt.
Hjúkrunarfræðingar eru langþreyttir á seinagangi í samningamálum en þeir hafa setið við samningaborðið í 10 vikur. Trúnaðarmenn hjúkrunarfræðinga funduðu í gær og skoruðu á stjórn Hjúkrunarfélagsins að hefja undirbúning verkfallsaðgerða og yfirvinnubanns.
Guðrún Björg Sigurbjörnsdóttir, aðstoðarmaður framkvæmdarstjóra hjúkrunar á Landspítalanum tekur í sama streng og Kristín. Hún segir að svona aðgerðir hafi veruleg áhrif á starfsemi spítalans enda er stór hluti vinnu hjúkrunarfræðinga unnin í yfirvinnu. Að hennar sögn eru ekki til fyrirfram ákveðnar lausnir við þeim vanda sem skapast. Sjúkrahúsinu beri hins vegar skylda til að sinna sárveiku fólki og sinni fyrst og fremst bráðatilfellum verði aðgerðir hjúkrunarfræðinga víðtækar.
Trúnaðarmenn hjúkrunarfræðinga funduðu í gær og skoruðu á stjórn Hjúkrunarfélagsins að hefja undirbúning verkfallsaðgerða og yfirvinnubanns. Elsa segir útlitið í samningaviðræðunum svart og viðræður í hnút. Báðir haldi fast við fyrri tilboð sín.
www.ruv.is 30.05.2008
