FORYSTUSVEIT lífeyrissjóðanna fundaði í gær með fulltrúum Landspítala og heilbrigðis- og fjármálaráðuneyta þar sem rætt var um hugsanlega þátttöku sjóðanna í byggingu nýs hátæknispítala. Aðgerðahópur lífeyrissjóðanna, alls um fimmtíu manns, sat fundinn.
„Núna erum við að leggja drög að viljayfirlýsingu um að við lánum fjármuni til byggingar sjúkrahúss. Við nálgumst verkefnið með jákvæðum huga en höfum þó ekki gefið neitt formlega út. Ég vona samt að svo geti orðið innan tíðar, en vissulega tekur þetta nokkurn tíma, svo sem að fara með málið í gegnum hið félagslega bakland sjóðanna,“ sagði Hrafn Magnússon, framkvæmdastjóri Landssamtaka lífeyrissjóða, í samtali við Morgunblaðið.
Björn Zoëga, forstjóri Landspítalans, og Ingólfur Þórisson kynntu sjúkrahúsverkefnið og helstu útlínur þess fyrir lífeyrissjóðafólki í gær. Þar kom fram að sparnaðurinn af því að flytja alla starfsemi sjúkrahússins á einn stað, það er á Hringbraut, gæti numið alls nítján milljörðum króna á fjörutíu árum.
Stofnun framtakssjóðs er annað stórverkefni sem nú er unnið að á vettvangi lífeyrissjóða. Þess er vænst að sjóðurinn verði kominn á fót eftir einn til tvo mánuði, en honum er ætlað að auðvelda fyrirtækjum sem eru í kröggum en eiga sér þó framtíðarvon að komast yfir erfiðasta hjallann. Þar er einkum horft til fyrirtækja sem eru gjaldeyrissparandi og -aflandi.
www.mbl.is 27.10.2009
