Næstkomandi fimmtudag, 18. mars 2010, verður minnst 250 ára afmælis Landlæknisembættisins. Í tilefni afmælisins verður efnt til hátíðardagskrár sem fram fer í Hátíðarsal Háskóla Íslands. Dagskráin hefst kl. 13:00 og lýkur kl. 17:30.
Heilbrigðisráðherra, Álfheiður Ingadóttir, setur samkomuna með ávarpi og því næst flytur Margrét Björnsdóttir, settur forstjóri Lýðheilsustöðvar, afmæliskveðju.
Meginuppistaða hátíðardagskrárinnar eru fimm erindi fræðimanna um ýmsa þætti í sögu embættisins frá öndverðu þar sem litið verður yfir þróunina allt til þessa dags. Að erindunum loknum flytur Ólafur Ólafsson, fyrrum landlæknir, afmæliskveðju og loks ávarpar Geir Gunnlaugsson landlæknir hátíðargesti með lokaorðum.
Fundarstjórar verða Örn Bjarnason læknir og Sigurður Guðmundsson, fyrrverandi landlæknir.
Að hátíðardagskránni lokinni býður Landlæknisembættið til klukkustundar samveru með viðstöddum þar sem boðið verður upp á veitingar. Hátíðardagskráin er öllum opin meðan húsrúm leyfir.
Hátíðardagskrá 18. mars 2010 (pdf)
Sjá meira um 250 ára afmæli
